喺呢排,中聯辦飼養果啲狗又空群而出,有件叫卓澄嘅友仔,呢位乜叉倫敦人妻先生,話世界無咁重視香港,啲銀行可以搬去新加坡咪得。跟住我懷疑呢條友,係真基定假基,點解我咁講,因為Investment Bank又好,或Corporate Bank都好,都有好多同性戀者,而呢個正係點解香港仍然十分具優勢,而 反送中 又咁重要嘅原因。
反送中 點解對銀行界重要
要成為金融中心,有好多條件配合,除咗金融法規,因為吸引人才嘅緣故,其實依家各大銀行,都十分重視對同性戀者嘅政策,空有寬鬆金融法規,但同性戀政策上根本無得郁,都係無得搞。而偏偏,喺同性戀者問題政策,新加坡堅係無得搞,2007年,新加坡政府嘗試廢除刑事法典377A條,但當時係搞唔掂,我要出手喺《聯合早報》協助解說377A何等不合時宜。由於當時引發社會爭論太大,所以依家李光耀個孫出埋櫃,結埋婚都好,377A都仍然廢唔到。而新加坡一日無法俾同性戀性行為合法化,都無法吸引人才,我都唔計其他嘢。唔知卓澄向啲乜人收啲乜風,如果佢性傾向真係基嘅話,無理由唔知377A條係好多跨國大行無法喺新加坡大展拳腳嘅原因。
所以卓澄果啲好明顯係五毛文章,亦係呢個原因,你講係東京,都仲好少少,至少日本無呢個問題,如果講係新加坡,連新加坡政府都知,或者Wealth Management收到好多存款,但人才呢部分係連人民行動黨都束手無策,李光耀在生都搞唔掂呢個問題,依家李顯龍要解決都力不從心,唔係佢嘅錯,係南洋民風如此。其實話新加坡漁人得利,係新加坡人都唔敢咁講,因為新加坡自己都知有啲嘢,佢無法取代香港嘅深層原因。一個北有大馬、南有印尼,兩個回教勢力都蠢蠢欲動嘅國家,如果依家廢除377A,我都覺得李顯龍勇過龍。
都係果句,做過夫子會嘅人,做過梁振英嘅狗又唔交代,就咪咁大聲,依家啲人唔係金魚記憶,同埋方丈都好多。其實大家都知,你所謂倫敦人妻先生編嘅古仔,錯漏百出,但錯到咁嘅basic fact都唔知,我只能講,中共啲維穩費都係派得有啲亂。

