周浩鼎無錯係執業律師,但唔係一個適合做民選議員嘅執業律師

螢幕快照 2016-02-24 下午10.56.45

今期《壹週刊》質疑周浩鼎係咪執業律師,我因此上去香港律師會查律師名冊,得出以上結果。

以上結果代表乜,就係周浩鼎無錯係律師,持有執業證書,只不過,他既唔可以幫市民打官司(因為佢唔係任何律師行嘅助理律師或合夥人),而呢條友選佢做民選議員,喺某啲事項上會有極強烈嘅利益衝突問題。

先講周浩鼎依家執業狀況,周浩鼎呢種情況,正式中文名叫企業律師,即係in-house lawyer,in-house lawyer做乜,就係因為根據《法律執業者條例》第74條,有啲文件,唔係阿茂阿壽都可以草擬,而係要有個具備執業律師資格嘅人去起草,所以大公司、搞開Merge and Aquisition果啲公司,都需要請個律師長駐自己公司,專門睇文件同起草文件,或者就某啲事項好快就有法律意見,所以就有in-house lawyer。但由於in-house lawyer唔受聘於任何「律師行」,佢地張執業證書,好多都係豁免咗俾專業責任保險(每年都要俾,一旦有專業疏忽至少有得賠,保障市民),所以亦唔可以隨便代表人打官司。

一般律師或大律師,無論佢代表邊個都好,佢代表邊間公司代官司一回事,但佢喺議會嘅立場唔一定同佢代表嘅客戶有關,大狀係用cab rank rule,有人搵你,除非堅有利益衝突,或對方無錢俾,否則不得拒載。而律師,雖然唔受Cab Rank Rule所限,但好多律師行,都係打開門口做生意,你俾得起錢都接(所以周浩鼎投訴楊岳橋向旺角騷亂被捕人士提供法律服務,簡直黐線,事務律師搵佢就要做,就係咁簡單)。

但問題係,周浩鼎依家係新世界嘅僱員,仲要in-house lawyer即係做法律部門,一定跟管理層嘅指示做嘢,唔係佢間行個老闆接咗新世界生意,佢無得唔做果種。如果有物業問題上,同新世界有關,你搵唔搵佢先。有城市規劃問題,同新世界有關,你搵唔搵佢先?你要投訴新巴、城巴,你搵唔搵佢先?我依家唔係選功能組別議員喎。

所以,大家諗清楚,一個做in-house lawyer嘅人,啱唔啱代表你閣下。

(同區嘅候選人有梁天琦、楊岳橋、方國珊、梁思豪、黃成智、劉志成)

發表迴響

你的電子郵件位址並不會被公開。 必要欄位標記為 *