由 忽然一週 停刊到紙媒的前途

忽然一週
忽然一週

表面上, 忽然一週 停刊係唔關我事,因為佢係八卦周刊。但作為壹傳媒曾經最賺錢嘅雜誌之一,竟然仲早過《壹週刊》停刊,作為紙媒人,唔驚係假。

忽然一週 停刊,當然有佢嘅社會同市場因素,壹傳媒嘅讀者對娛樂圈中人反感,依家嘅娛樂新聞嘅juicy程度遠唔及政治新聞,同埋周刊呢個尷尬format難同手機競爭,都係問題。

但更大問題係,如果紙媒繼續想收費,或繼續以physical形式distribute,究竟紙媒可以俾到乜內容讀者,令讀者一定要俾錢,或願意忍受比手機差載體去睇你?如果紙媒仍然有自我審查,或者一啲白痴總編輯,為咗包容佢啲白痴朋友,將成份報紙嘅內容搞到不似人形,評論全部係阿媽係女人,咁點解我唔直接click作者嘅blog呢?facebook嘅newsfeed己經變相成為一個新聞中心,報紙嘅最大競爭對手,呢個係不爭事實。

當然,依家網媒嘅revenue model都相當唔明朗,但我相信,Content + SEO(所以文字內容仍然重要,因為keyword)+ 廣告或e-commerce係重要。而內容嘅價值,亦唔會只會喺發表果一刻。好似呢度最近最多人search嘅內容,係同一個叫黃敬嘅白痴有關。

我都摸索緊,但我可以咁講,如果作為作者,繼續做文抄公,或者言之無物,又無營商能力,想齋靠寫嘢生存到,除非你有陶傑咁叻,否則真係好有難度。賺稿費嘅年代,將會好快過去。

發表迴響

你的電子郵件位址並不會被公開。 必要欄位標記為 *