守衛dbc之戰

我唔鍾意打無勝望嘅戰爭,但守護dbc之戰,在情在理,呢幾日我都親自上陣。我諗我要對我呢幾日嘅參與作一啲解釋。

1. 我幫林旭華將段聲帶upload上YouTube,我係極力主張upload果條友,亦係我通頂將佢剪埋兼upload。我作出呢個決定理由有幾個:

a. 一直以嚟,都無中聯辦亂港嘅實質證據,雖然黃楚標同李國寶喺聲帶上都係hearsay,但喺政治上,中聯辦已經必須回應呢項首次曝光嘅實質證據。事實上,由梁振英到中聯辦集體潛水,黃楚標顧左言他唔知講乜,《東方日報》頭條更加曲線證實,就知中聯辦確實亂港。

b. 當好多新聞界無恥老總,天真嘅記者都唔肯將段帶曝光,唯有就係自己鋪陳證據,迫傳媒做嘢。呢件事話俾大家聽,同國民教育嘅中國模式教材一樣,要迫傳媒做嘢,最好自己用網上嚟爆料,靠香港傳媒簡直係多餘。

c. 我好奇怪呢段帶曝光後,有啲主張港中分隔嘅人一句聲都唔出,唔好話出嚟講,幫吓手吹雞都好。呢段帶,咪係主張港中分隔最佳證明囉。我對自己嘅政治信仰,有完整好多嘅判斷。

d. 當然呢餅帶,我要孭一定程度人身安全風險,呢一役dbc好多人都有人身安全風險,但同中聯辦拗手瓜唔理得咁多。更何況我狂丙黃毓民,以及港獨主張,都令我累積唔少人身安全風險。

2. 我喺政總三日集會嘅作用係孭鑊人,我係根據《公安條例》申請政總個場。點解我要喺阿牛take over都前,先上台公布法律上集會已經結束,我有以下考量:

a. 我唔想有人乘機用非法集會名義玩打壓。

b. 我唔想蘇卡片條仆街,借dbc宣傳非法集會之名收番牌照,因為我唔肯數碼港已經做妥switch over。

c. 在場有唔少dbc員工,我有責任確保佢地日後搵工唔受影響。

d. 在場嘅公公婆婆,佢地係未ready參與一場可能有警察清場風險嘅抗爭。

e. 我宣布咗法律上結束集會,阿牛接手至名正言順。事實上,阿牛亦立即上台。

f. 我呢個安排,係吸取咗學民思潮宣布退場就完全無人交接嘅經驗。大家應該多謝阿牛,立即安排有意留守嘅群眾留落去。

我唔係dbc嘅員工,做節目亦唔叻,特別我啲檳城粵語對聽眾受罪我係理解(同我家史有關)。成個dbc抗爭,我諗有部分嘢,等到我老咗寫回憶錄至可以詳細講。但作為一個評論人,我亦都要落場做政治判斷。

仲有,大家行過政總,幫樓南光打打氣。


5 thoughts on “守衛dbc之戰

  1. 今日DBC,前一排又東北割讓同洗腦科, 香港ge A貨自治都唔知幾時玩完.

    雖然我唔係香港, 但係見到自己出身地越黎越變成同中共國一樣時, 真係好唔開心…

    都唔知中國人有乜共業, 當年居然搭上共產黨.

發表迴響

你的電子郵件位址並不會被公開。 必要欄位標記為 *