無私人法案,拉布拉條毛?

人民力量呢班政治抽水黨,為搏懵呃票無所不用其極,以下Facebook圖片,簡直係人民力量低能嘅典範

呢班友以為踩低人地,可以抬高自己。結果佢地嘅主張,反而暴露咗人民力量兩位現任議員,在位四年都唔知《議事規則》係乜嚟。

由於香港嘅議事規則傳自殖民地年代,英國人為防立法局有人玩嘢作反,寫起嚟處處提防,可以拉布嘅位唔多,而可以無限或接近無限拉布嘅位,只有:

1. 財務委員會審議撥款嘅質詢期間,係咁提問題嚟拉布,反高鐵正係呢隻拉布,但呢隻拉布,要大量議員,你估人民力量幾丁友夠拉?無泛民合作,每區一席你都拉唔到,嘥氣。
2. 替補機制嘅拉布,係審議條例草案果陣,全體委員會階段藉提出大量修訂嚟拉布

我想問,新立法會開鑼期間,乜有財委會議俾你拉布咩?乜有新條例俾你拉布咩?上個立法會屆別未審完嘅條例,係唔會帶落下一年。如果泛民議員唔提條Private Member Bill,你人民力量拉啲乜呀,拉條毛?

仲有,如果要喺全體委員會階段狂拉,一方面土共可以利用議長剪布,除非泛民過半可以爭議長位返嚟,另一方面,上次人民力量得兩件,再加長毛,再加公民黨暗幫拖,都拖到天荒地老,土共個個坐到變望夫石,駛鬼選多幾件人民力量嘅入去咩。

至於要提條點嘅Private Bill嚟拉布,技術上大把嘢玩,但可以肯定係,呢班人民力量嘅友仔係唔識拉布。仲要其實拉布呢樣嘢,係反高鐵期間泛民議員有份打,你估係黃毓民自己引入架,嘥氣喇。


7 thoughts on “無私人法案,拉布拉條毛?

  1. 我不是人民力量的支持者,但私人草案看来真係廢過拉布。特首否定哂所有私人草案的話,咁即係傾都無得傾。所以我想問博主,Private Bill 點樣係技術上大把嘢玩?

  2. 其實為甚麼還相信靠選幾個泛民立法會議員可以改變香港政治生態?人民被議員代理,隨時被出賣,政府又可以制定保皇議事規則,大家團團轉又要投邊個,唔投嗰個。

    無人教一個事實,要社會改變現在要靠自己,沒有人(包括議員)可以代替你!

    萬一選出黎個個都係屎,仲話明「我有民意授權架!」,香港人唔通又照「硬食」?(香港人問下自己,民間力量有冇推倒過任何黑人憎既議員下台(好似尐鼠X芬,又或者黃X指呢尐老patpat)?

    又話要靠「超級區議會」搞另類公投。四個字「不知所謂!」,仲靠立法會?自己搞公投啦!

    仲諗用最「傳統」既途徑去改變香港社會,有時要先破壞舊制度,再由頭做起!

  3. 1. 香港有部分學校嘅獎學金,甚至學校本身係有條Private Bill跟,如果間學校嘅Private Ordiance修改,特首係唔可以反對。例如有人修改《中文大學條例》,加條話收生時不得考慮德育及國民教育科成績,特首亂咁否定已經可以被司法覆核。

    2. 要破壞舊制度,要支持革命嘅人過咗critical mass,依家仲爭啲。

  4. 問題就是,沒有人大力宣傳這個不公平的制度。(就正如有尐人話罷工罷市罷課好暴力一樣!)

  5. 拳頭教自稱本土, 混淆視聽, 我們要力保毛孟靜, 范國威
    九東我不介意黃洋達, 超級一定要投!
    你反對政改的, 涂謹申; 重基層民生的, 馮檢基!

  6. 多謝分析!
    只可惜人力的宣傳機器實在厲害,而且好明顯人力好有錢,相比之下社民連真係窮到痺。絕對懷疑那些左派機構為甚麼會捐錢給人力,一係中央在用毛澤東的「拉一派,打一派」的戰術,令泛民自相殘殺,一係就係中國的權鬥在香港的延續,人力代表了某一派系的立場。我認識的朋友之中,一些本來公民、社民連的支持者,現在不少都轉投人民力量,非常令人憂慮。

    陳士齊分析人民力量的問題:
    http://www.youtube.com/watch?v=LOZXWvlhGwU

    訪問很長,但總結作為幾點:
    1. 黃毓民以樹敵為樂(這一點很像毛澤東!),為了人力上位,不斷攻擊其它民主派。結果只是分薄各民主派系的票被人力了,一些本來五五波的候選人將會墮馬,同時益了建制派。

    2. 人民力量的人質素參差不齊,黃毓民、陳偉業還算是對政制比較深入認識,慢必還可以,黃洋達和劉家熊根本就乜都唔識,一問到民生問題俾人問到口啞啞。

    3. 製造個人崇拜,沒有清楚的會章,人力自己的黨組織裏面根本上沒有民主的機制。黃毓民基本上是「朕即民主」,口裏說爭取民主,但行事手段卻獨裁專制。(這一點很像蔣中正)

    4. 他們所談的民主都是口號式的、理念式的,卻完全不顧基層的工作,是以區議會選舉大敗是必然的,卻企圖令其它民主派的區議員墮馬,結果只是破壞基層的民主力量。

    5. 他們的立場飄忽,例如修正國民教育課程,他們卻竟然棄權或缺席。他們根本沒有一個清晰的政綱,經濟上到底是右派(支持自由巿場),還是左派(遍向社會福利),也是非常含糊。有如奧巴馬選舉時的口號 change,空有口號而從來說不清到底改變甚麼。 Change what?
    http://www.legcovotes.net/?bill=edu

發表迴響

你的電子郵件位址並不會被公開。 必要欄位標記為 *