第二次封咪戰爭

圖片由香港數碼廣播有限公司提供

因為大狼粉李國章教授拒絕支持注資方案,加上黃楚標明顯被人揸住春袋,香港數碼廣播有限公司爆發第二次封咪戰爭,梁振英唔想鄭大班再度主導社會輿論。

本來香港數碼廣播有限公司用DAB技術廣播唔睇好,政府俾唔足輸出功率,又唔係個個想買新嘅DAB收音機,大班管理DBC嘅手法唔可以講無膠力。喺戰術錯誤一大堆下,本來DBC唔會成脅。

只不過由董建華垃圾班子演化而成嘅梁振英班子,喺2004年封咪戰爭以嚟,一啲進步都無,而環顧咁多年,香港亦未出現過新嘅名嘴,建制派名嘴垃圾如昔,大家睇亞視Rachel周不時可以KO周融就知。喺大班重新開咪幾個月後,好多人走去買返數碼收音機,因為真係無嘢聽,大班、鄭家富加劉細良夫婦嘅組合,雖然未完全係2004年封咪戰爭full team陣容,但基本上已經夠主導社會議題有餘(李慧玲?嘥氣喇),梁振英本來就二仔底,喺唔想再衰落去情況下,就決定叫李國章玩嘢。而工聯會借鄭家富批評港鐵嚟玩嘢,明顯係進攻訊號。

你或者對大班好多講法唔同意,大班營運DBC嘅方式係有要改進嘅地方,但依家對付梁振英戰略形勢下,DBC係一個重要戰略炮台,應該要力守。所以書展期間我買咗部數碼收音機,除咗我攞嚟聽BBC World Services外,更重要係一種姿態,呢場仗係唔可以俾梁振英完全控制大氣電波嘅灘頭陣地。


3 thoughts on “第二次封咪戰爭

  1. 我早排買了一部,它附送的耳筒唔係好得,載兩載就跌落黎,惟有用番自己私伙嘢聽。

發表迴響

你的電子郵件位址並不會被公開。 必要欄位標記為 *