十號風球搞到乘客滯留:東京人會怎辦

一場十號風球搞到有乘客滯留港鐵東鐵線(前九廣鐵路英國段線),鄭家富喺DBC個節目丙港鐵,搞到有人誤會佢亂丙前線員工,黃色工會工聯會想乘機抽水打擊新民主同盟選情。

鄭家富講交通係膠膠地,一個香港仔隧道居然敢超速仲俾人影到快相嘅硬膠你想點?但係港鐵員工嘅處理手段,亦唔叫合符標準。上個月超級颱風谷超由名古屋掃到東京,喺東京都仲有Cat 2威力,我果陣喺東京,我睇到人地JR東日本係點做。

首先,JR東日本都唔會所有線都運轉見合(即係停駛),可以維持到服務都儘量維持。果陣JR東海嘅新幹線,同行經東海道本線嘅車就停,因為颱風影響下,東海道本線同東海道新幹線照行真係好牙煙。果陣JR東海喺東日本轄區嘅新幹線列車,係照樣維持電力,唔會熄燈。而東海道本線上受困嘅車,都會維持電力,只有情況唔掂,JR東日本就派出用柴油嘅列車載走乘客去就近車站暫避,而一旦天氣許可,亦立即恢復服務。

由於日本JR大型車站多數係天災可以過夜(東京車站上鑊311大地震咪係東京最大難民營之一),所以乘客喺車站過夜係ok,香港唔係所有車站都可以過夜,但利用柴油工程列車或貨車,載乘客去九龍塘或沙田呢啲大型車站暫避係可以做得到。呢種應變措施,係應該參考日本人點做,因為港鐵唔再係以往只係營運市區路線,西鐵線同東鐵線已經係市郊路線,應付滯留路上嘅市郊乘客或跨城乘客係應該有一套應變措施。接駁巴士派唔到,或唔安全,咁柴油列車載少量乘客穿梭往來係可以做到。

仲有一點好重要,依家港鐵無官方嘅事故資訊機制係唔合理。喺東京,乜嘢人身事故(跳軌,呢樣嘢日本經常有),故障造成遲延,唔單只有遲延證明書,更會透過車站資訊系統、網站等通知市民,有颱風、地震等天災,NHK係一定有呢啲資訊。點解香港可以膠到由港鐵員工自發嘅MTR Update扮演呢個角色。喺車務資訊透明度上,港鐵管理層係抵丙。


9 thoughts on “十號風球搞到乘客滯留:東京人會怎辦

  1. Bear in mind that storms at the latitude of Japan tend to move very quickly, typically more than 30 km/h. That’s a lot faster than storms in the West Philippine Sea/South China Sea. Therefore the durations of the impact of the storms are much shorter. (In comparison in HK signal no. eight or above can last for more than twelve hours.) Train services can be resumed more quickly in Japan. But yes indeed there are really a lot that MTR should learn from JR.

  2. 用柴油車載去九龍塘唔可行, 因為九龍塘站就係煙墩山隧道入口附近, 柴油車未必夠力入到煙墩山隧道! 當年同時有電氣化火車同柴油車O既時候, 柴油車一般唔經九龍塘!

  3. 有少少離題想問,香港有多少人舒服慣左,退化到面對颶風甚至天災危困時,唔曉隨機應變,自保自救?只懂一味埋怨冇得拎$200搭的士?

    上一次多年前掛十號風球時,我真係剛剛身處火車上,一樣等左好耐至埋番站,坐左幾個鐘頭,等落番風球至搵車走人,天氣非人力可干預,唔想怨天怨地。

    再扯遠一點講,當晚如果唔係自由痕之類,本地人若知八號風已掛多時,係唔係事必要趕尾車返屋企,開夜班的同老細講數,留宿在工作地方可唔可以?

  4. 義不容共 – “有少少離題想問,香港有多少人舒服慣左,退化到面對颶風甚至天災危困時,唔曉隨機應變,自保自救?”

    隨機應變﹐自保自救﹐需要自我思考﹐而自我思考﹐係香港人嘅弱項。香港嘅教育制度(國際學校唔計)從來唔鼓勵自我思考﹐大陸更加唔使講﹐每日五百單程證﹐十幾年來(即上個十號風球)已經輸入咗過百萬慣晒中央思想主導嘅大陸人到香港。日日住香港可能唔多覺﹐但一兩年返香港一次﹐就會發覺香港越來越nanny state。全城人日日都跟足指引過活﹐一旦有突發事件﹐只會識揾指引﹐邊有可能隨機應變?

    唔好話我批死﹐今次事件﹐結果就係港鐵要制定指引﹐十號風球行唔到車啲乘客要點處置。立此存照!

  5. 又咁講,單係講班乘客嘅話,無毯無扇,神仙難變。遇著呢啲事,對住啲職員嘈幾句呻幾下,屬意料之內。用嚟類比嘅話,機場搭客滯留事件都大把,惡劣者好似「強國」子民咁粗暴,開口埋口「無我哋你哋香港死 Q 咗九世」大把,亦唔係香港獨有 (eg. 歐美航空業罷工,啲客圍住任何有關職員爆粗、隨處瞓食屙之類,唔係未見過)。睇電視所見,堆乘客嘈幾句之餘都未至發晒瘟亂咁中,甚至隨地大小便、「打砸搶」、郁手郁腳打職員之類,個個都係死死地氣拎張紙皮攤響站入面瞓,天光後逐漸散去。咁嘅情形,完全唔見得好似出面某班人所講,又「暴民」又乜又七。小事一件,響電視睇完都無咩感想。

    至於話「隨機應變」,呢樣嘢有限度有條件,唔係話「變」就「變」。日本人德國人啲井然有序,就唔係一般所講 “everyone for himself”,而係多年來千錘百鍊,政商民各方配合,有制度同互信先做到,唔係純粹 ad hoc 反應。「隨機應變」嘅另一面就係「各師各法」,再多個 implication 就係「出事邊個孭」;華人社會講呢味,超高風險 (叢林割喉式失控 + 爆大鑊一地都係之後個個走數,你賴我我賴佢)。

  6. 「就會發覺香港越來越nanny state」

    絕對係。全世界重有邊個城市既地鐵會叫乘客「請緊握扶手」?

  7. 呢度分享一下吧, 不知樓主看過沒有

    日本人之前一個很好的web site, 教大家如何在災難當中提高存活率, 及後地震佢地真係學以致用.

    http://www.olive-for.us/

    裏面有很多資料性的東西, 還有一些小冊子, 教人點樣得到水/取暖/生活等細節, 資料雖然是日文版, 但如果看小冊子, 基本上看圖都會明白, 值得分享一下,

    小冊子

    OLIVE PAPER separate.pdf | olivesoce

    OLIVE PAPER_vol2.pdf | olivesoce

發表迴響

你的電子郵件位址並不會被公開。 必要欄位標記為 *