香港離百分百言論自由仲有好遠

新民黨,以及佢嘅前身匯燃致富,一向都以成棚人係美國留學做標榜。英文講到好鬼美國人咁,成棚中產膠以為呢班友好掂。

一個真係認識,同認同美國價值嘅友,只會認為呢班hihi通通都係A貨。任何讀美國憲法開始讀法律嘅人,都知First Amendment(國會不得立法限制言論自由)有幾神聖。而美國日常生活,亦係貫徹第一修正條款嘅地方。

呢個為Bradley Manning求情嘅廣告出現地點係非常挑機,喺唔少五角大廈(即係DoD)人員所住嘅Crystal City地鐵站(列根機場之後果個站就係佢)入口,但美國華府市政府,並無因Bradley Manning涉及一啲國家安全有關罪行,唔俾佢登廣告。俾著港鐵,你試吓籌旗整個批評梁振英嘅廣告,你睇吓港鐵會點審查你,房署都審查民主黨人嘅反梁海報。香港仲話有言論自由,信佢就奇。所以葉劉話自己美國學到乜乜乜,佢二次創作乜立場都露晒底喇。

當然,華盛頓市政府亦好識得用言論自由,爭取政策得到民眾支持。呢個充滿膠力嘅Taxation without Representation嘅車牌,係華府官方俾民眾,爭取將Washington DC升格為州。因為依家Washington DC位置極為尷尬,喺眾議院有議席,但喺參議院因為唔係state,同波多黎各一樣無席位。如果曾蔭權爭唔到普選,真係玩鋪玩係學DC市長咁,成街都係向北京要求普選嘅車牌,咁咪搞掂。

好多人對黃耀明出櫃拍爛手掌之餘,大家有無覺得好悲哀。喺美國一個由講粵語、寫正體字嘅人執政嘅城市三藩市,一入Castro區大大支代表LGBT運動嘅彩虹旗豎喺度,喺香港?隨時蔡志森率領一眾明光社嘅塔利班中人走去拆旗。唔好話華人無辦法包容同性戀,三藩市係粵語通行,政府官方文書都用正體字,連市長都係華人嘅城市,點解三藩市得香港唔得?唔怪得香港做唔到國際都會。

當然人地商界都好識得主動出擊,爭取自己嘅主張得到公眾認同。好似班軍火商,喺Pentagon City車站關於F-35嘅廣告,乾淨俐落,Security and Jobs,講完,香港啲商界幾時至識醒少少。


10 thoughts on “香港離百分百言論自由仲有好遠

  1. Being a Canadian, I want to thank you for your great obversations on the spirit of North America.

  2. 蔡志忠確實有包容過同性戀,亞蘇絲黃同余真迷俾佢包容過囉,差無賣廣告祝福佢地麻。係基督教面前,光明正大講 “佢同我地都支持同性戀仲得”。

  3. 不是得罪, 香港人在梁振英當權下真的做了奴隸, 也是活該的。 香港某些偽中產自己底線不斷向下移, 人家出聲去反對, 便話要搵食, 要和諧, 不要搞事。 那麼好欺負, 不欺負你香港人, 欺負誰? 人家的自己, 是先賢辛苦流血爭取回來的。

  4. Jay: Also as a Canadian, don’t you find it extremely ironic with the F-35 advertisement that world governments are spending money on defenses that don’t work for our own environments?

    Also, Toronto’s mayor has declared that for the 2nd time in a row, he’s not going to show up at Pride – one of the largest in North America. Conservatism is not just a Hong Kong thing, it’s everywhere.

  5. 成街都係向北京要求普選嘅車牌? 咪玩啦, 香港人得咩? 變相公投時有幾多人投票?

    老實講, 唐梁之爭, 之所以搞到香港人咁忽然普選, 靠既係乜? 靠既唔係乜嘢政治堅持或對政治既關注, 而係啲黑材料所造成既大量師奶級八卦新聞.

    只係關心八婆嘢咋. 以為呢班人去爭取乜乜物物, 只係美麗的誤會.

    香港人就係最鐘意呢啲三日鮮. 香港人既皮包住既, 內裏仲係中國人既涵, 淨係會掛住搵錢. 呢啲忽然普選, 出年就唔記得架啦. 中國人, 從來都只係用嚟養嚟生蛋既 — 只要搞得掂兩餐同樓價, 好易養之嘛!

發表迴響

你的電子郵件位址並不會被公開。 必要欄位標記為 *