中國亂七八糟,流選有著數

相信好多人都唔信自己對眼,點解喺百度打八九年六四,居然搵到唔少嘢。因為溫家寶喺十八大權鬥裡面,以平反八九民運作為政治武器,英國《金融時報》亦都有報導。

呢幾日北京嘅局勢都係詭異不明,消息亂咁飛,由王立軍出走美使館搞出嚟嘅膠,似乎越嚟越不受控制。連特首爭霸戰都係呢場亂仗嘅伸延部分,就可想而知。

當然,平反八九民運唔代表中共呢班hihi會做好人,因為中共依家基本上無件好人,人人皆渣。但更大鑊係,因喺重慶太多利益,同薄熙來著同一條褲嘅周永康,佢手上有武警部隊,武警都係解放軍編制,都打得下,加上薄熙來問重慶兵工廠訂五千枝槍唔知去邊。或容我咁講,依家隨時係中共權鬥惡化到,隨時引發武裝衝突,或者有人借香港特首選舉倒屎,乜膠都有。

呢啲北京都膠到亂七八糟嘅形勢,梁振英得到中聯辦支持,隨時係假傳聖旨,一旦佢對家失勢,香港就變咗某派人質,屆時香港人條命會好凍過水吓。所以,最好係流選,白票對建制派以至泛民都係最有利,跟車太貼會hihi。

更何況梁振英心術不正,陳方安生嘅變色龍描述,可謂一矢中的。你攞你自己、你嘅身家、你子女嘅生命同前途嚟俾條hihi做注碼,你有無搞X錯?


15 thoughts on “中國亂七八糟,流選有著數

  1. 我呢廷升斗市民幾年前都知 CY 唔係好人。誠信極有問題。
    班契弟依家先識驚。遲唔遲D啊!!
    大局已定。我們等着被共產黨全面接管。學定翻牆技術吧。

  2. 幾年前小弟已經覺得,平反六四冇乜大不了,下旨武力鎮壓嗰班,早已遠離中共權力核心(甚至人世),只要出現政治權力鬥爭,平反六四不難成為其中一方嘅一個殺著。

    六四最大得益人是江澤民。用平反六四來打擊江系,其實係幾正路嘅一招。

    真正嘅平反,恐怕只有regime change才能做到。

  3. 當務之急,呼籲鐘庭耀取消明日的公投,否則既被民建聯和中聯辦利用捏造民意,更會再被郝鐵川等上鋼上線:

    “由於民建聯及其他左派政團掌握不少選民登記資料,包括市民的身份證號碼,有消息稱,他們已經大量購入電話卡,以便在當日代替市民、尤其是已移居內地的香港居民在網上投票挺梁,總之是要製造梁振英民望高企的假象,希望各選委3.25「硬啃」這隻狼。《蘋果》記者”

  4. 親子師奶網嘅一班無知婦嬬仲要撐話CY有魄力及無私人醜聞,比起成日玩女人嘅唐狗會身心健康好多云云。

    真係仲未知道死字點寫,另我懷疑有好多土共滲入埋呢D論壇製造對CY有利嘅洗腦訊息。

    而家形勢真係非常危急……

  5. 老毛共賊爛理論:凡是敵人反對的,我們就要擁護;凡是敵人擁護的,我們就要反對……

    邏輯當然說不過去,但今次亂局用來同共匪玩膠,卻不無道理。

    黑社會恐嚇勒索,往往要受害人怯懦怕事,才能得逞。

  6. 小P: 啲師奶八公抱住嘅心態係 “你唔出聲咪唔會有鎮壓出現囉。收聲唔駛死架, 唔會無飯食架”
    所以香港係極度有可能死响呢班自以為是嘅師奶八公手上

  7. 個人意見:就算流選﹐狼一樣可以借屍還魂﹐曾肉城又好﹐孽瘤又好﹐結果都係黨人治港﹐情況未必好得過狼當選。

    泛民/豬營可以派邊個上? 李柱銘又好﹐陳四萬又好﹐睇唔出會受阿爺blessing。

    倒不如 think outside the box﹐泛民/豬營合作﹐捧龍豬上﹐地產黨俾共產黨 thrown under the bus﹐點解唔示範俾阿爺睇﹐敵人嘅敵人變自己嘅朋友﹐呢招唔係阿爺先識玩。

  8. Alvin兄,問題就係中共玩權術已經係爐火純青(是的,它的治國方針同意識形態早就破產,但係論手段我仲未見到中共老態龍鍾),我自問全世界冇一個非共華人夠中共鬥。你認為香港人夠中共玩嗎,你話think outside the box中共老早就諗定點拆你的Plan A, B, C, D, E,中共仲會畀你喺立法會玩,一記老招-招安就玩掂80%的泛民/豬營,仲可以玩下去?

  9. Joel兄 – 玩就九死一生﹐投降唔玩就十死冇生。連一線生機都唔搏嘅話﹐I rest my case。

發表迴響

你的電子郵件位址並不會被公開。 必要欄位標記為 *