如果我係中國,我會選擇中港分家

我知中國人普遍無呢個智慧,但如果我係中國嘅領導人嘅話,我會選擇中港分家。

南洋馬來族一向唔係太睇重國家統一,馬來西亞本來有汶萊同新加坡,汶萊選擇唔加入馬來西亞聯邦,新加坡夾唔嚟被趕走。亦因為新馬分家,反而仲相安無事,令印尼蘇哈圖政權倒台之後,印尼民眾反而接受到大部分信天主教嘅東帝汶離開。喺尤多約諾將軍未上台之前,海內外印尼知識界一路傾緊,除咗將印尼變成聯邦國家外,另一個選擇,係將印尼按唔同宗教、語言拆件算數,相處唔嚟無謂勉強。

當年東姑拉曼驅逐新加坡,一方面唔想李光耀真係反攻馬來半島,以李光耀喺馬來半島英語教育精英嘅聲譽,包括佢一口流利嘅馬來文(呢個亦係好多華裔領袖無),行動黨一個黨都可以取國陣代之。另一方面,因為一個新加坡,搞到三大族互相開片,亦唔係有腦嘅人管得掂。東姑拉曼既係王族,又係劍橋出身,娶過華裔老婆,亦做過政務官,佢知道有啲膠嘢,係佢或佢嘅接班人幾叻都唔會搞得掂。

依家咁嘅形勢,隨時觸發類似1947年2月28日台北發生嘅事件,一旦出現中港一定係世仇,係注定分裂無得救,仲衰過西藏同東土耳其(或者突厥,新疆呢個名我覺得真係要考慮停用)。台灣之所以族群問題搞到咁難解,因為好多本省籍人嘅祖宗係死喺二二八,或者白色恐怖,呢啲殺父、殺祖之仇係無得解。呢啲仇恨亦令台灣以中華民國之名獨立變咗有好大心理障礙,如果蔡英文贏到總統,就有望台灣走「奧地利化」之路。馬英九留美期間,做得太多膠事,佢都係預備一旦中國民主化果陣,有需要返中國本土吧。

為免水火不容,香港如果好似當年新加坡咁離開,香港對中國政治嘅影響力會減少好多,一如新加坡一離開,行動黨再無可能喺大馬發揮影響力一樣。咁樣反而可以靈活相處得到,新馬領導人或有爭拗,但民間往來至少係正常。你話真係高度自治都得,例如香港變成一個次國家嘅東西,內政自己搞掂,護照防務中國繼續代理,呢啲可以傾出嚟。一如汶萊同英國,今日都仲有一定關係一樣。

當然,我睇中國人係無咁醒,似乎中港關係,實向最壞方向走,因為文明教養呢樣嘢,無番一二百年都唔會搞得掂。勉強無幸福,但中國人偏要將自己搞成第二個南斯拉夫或者蘇聯。



14 thoughts on “如果我係中國,我會選擇中港分家

  1. 所以,晌佢地眼中,釣魚台可以放棄,江東二十四屯可以放棄。就係因為住的人唔係「自己的民族」。

  2. 中國人既大中國主義/大一統思想真係好難根治
    如果按照佢地既邏輯,奧地利,瑞士(大部分),列支敦士登,盧森堡都要歸德國統治

  3. 1. 你反轉了, 當初發明一個兩制就是為咗俾中港有所區隔. 而家係大陸發現唔使..香港當權/有錢人又唔覺得區隔既重要

    2. 族群清洗的形式和那個年代相差好遠了. 新加坡(李光耀)係知道新加坡既存在會改變印尼入面既勢力平衡….
    而香港係政治上, 經濟上. 都無改變中國既能力 同埋最重要既 意願…..

    所以結果是武力清洗, 還是細水長流既經濟清洗…..係無大分別…

  4. 一國兩制,中英簽署,聯合國備案,愈看愈似,中國A貨英國代工,加中英文說明書,再刊於外文刊物,似乎是信心的保証,由港人使用。代工那方憑經驗應該知是A貨, 為了關廠, 唯有照做。最現實的問題是,不用A貨就無得用,甚至挨餓。現在想退貨或收回產品要做很多功夫。

  5. 糖加薯: 如果這樣, 我們收回香港幹甚麼?
    唔幫国: 我們給你多小權, 就有多小權……….

  6. 中共如果跟香港分家的話,台灣呢?

    泛民也不會願意放棄對中國內地所餘無幾的”影響力”.
    尤其是以”結束一黨專政”為終極目標的
    支聯會和其關連組織(民主黨,民協等).
    “反中共”,是他們的賣點,如果中港分家,
    香港不受中共直接影響,他們還有市場嗎?

    看看民進黨,有辦過六四晚會嗎?二二八紀念晚會卻每年都搞.
    中國內地的問題,他們除了抽水以外,有向內地抗議過嗎?
    (民進黨有爭取釋放劉曉波,趙連海嗎?)
    以本土意識為賣點, 以獨立自主為目標的政團,
    會關心,過問那個完全沒有歸屬感的”祖國”嗎?

    香港人也一樣,要堅決的對中國的事不聞不問,
    才可以適當的心理狀態爭取自主.

  7. “不聞不問”可能有點誇張,但最少要夠抽離,
    將中國視為”鄰近國家”而非自己的國家.

    具體來說,就是要將華東水災當作菲律賓水災看待.

  8. 如果香港獨立的話,軍隊的問題要解決先。現在的港孩,自理能力真是令人擔憂,所以如果香港獨立的話,一定要從幼稚園起,培養未來主人翁的自理能力。

  9. 其實好果好好運用信息發達既方便, 其實今時今日己經唔駛經過支聯會, 開個GOOGLE+ A/C 就唔難搵到維權人士既消息.

    艾未未, 趙連海, 達賴喇嘛….. 仲有好多人, 一直都有上INTERNET, 佢地相信G+, 唔信FB 同埋微博, 但我因為一開始就推G+, 所以打從我玩G+ 至今, 我個 GOOGLE+ 己經滿有一圈國內維權人士的, 並且一直彼此都有消息流通.

    乜泛民仲對中國”影響力”咩? 我響佢地身上, 從來見唔到咯, 佢地唯一影響力可能就只係得番香港紀念六四呢一個民主廚窗, 而家中國維權運動, 根本就係自發進行, 並用INTERNET 作傳播, 泛民佢地有幾可G+?

    甚至我響內地我上G+ /微博收到既維權訊息, 仲比支聯會甚至泛民政黨收到既消息仲快得多好多.

發表迴響

你的電子郵件位址並不會被公開。 必要欄位標記為 *