合法劏房?新式籠屋?

香港太空艙月租招租

作為一個經常日本公幹嘅人,見到呢啲Capsule Inn竟然攞嚟月租,我覺得簡直黐線。

Capsule Inn之所有需求,唔係日本人連幾百蚊港紙嘅酒店都住唔起,講真,幾千円喺日本唔係乜嘢錢嚟。(搞到大家以日本酒店咁貴,因為香港啲旅行社hihi,如果識用日本本土嘅網站訂,日本酒店唔比香港貴,去日本旅行公幹,酒店唔係最攞命,最攞命反而係日常雜費,特別交通費嘅天文數字)

喺日本Capsule Inn存在一大理由,係日本放工好多人都要飲兩杯,你唔跟同事或商務客戶隊啤恐怕你都唔駛旨意喺職場生存,連我自己身為客戶,都難免從俗攞杯無酒精啤酒,總之你要攞啲類似酒精嘅物件喺手。

但日本火車唔係通宵服務,特別住得遠,坐的士返屋企又唔抵,因為的士日本一啲都唔平。而酒店唔一定奉旨有房俾你,咁你都係要瞓幾個鐘,兼可以沖涼咁解,簡單嚟講,你要類似機場嘅shower房嘅東西,但火車站無理由提供俾你。咁咪喺火車站或商業中心區整個Capsule Inn,等你可以休息吓,之後第二朝又返工,或者坐新幹線囉。

所以Capsule Inn無諗過俾你長住,因為Capsule Inn隔音、私隱等等都唔啱長住,佢係日本獨有職場生態嘅產物嚟。如果有公司認為大學生係要住Capsule Inn,我覺得係香港有病,班中國人想炒樓係唔係想炒到暴動咁?



5 thoughts on “合法劏房?新式籠屋?

  1. 昨天網上睇到呢間野,睇完詳情,真係覺得好悲哀:
    1)每個倉只提供卷簾,門都冇,無security不在話下,更加唔會有任何隔音可言。如果無朋友幫你睇住,去廁所浴室都要驚被人偷野。換句話講,一出街就要提走所有私人物品行李!喺個倉裡面同外界通訊只可以用whatsapp之類嘅短信app,講電話肯定會噪到人,全世界都聽到你講乜。

    2)冷氣只會在20:00-8:00提供,夏天嘅時候擺明係唔想你日間用佢啲設施。啲學生通宵挨夜後日間想睡一覺都幾難挨。要知道,那些倉係冇對流窗,夏天注定侷死。

    3)熱水只會在20:00-0:00提供,即係話,根本一年四季都唔想你日間用佢啲設施。太夜返想沖涼?很抱歉,就算冬天,你都只可以沖凍水涼,一係醃鹹魚過夜。到時啲倉嘅衛生情況,可想而知。

    4)每個倉有電視…正想像緊啲住客個個開住部電視,仲唔成個街市咁?想早瞓都幾難。

    咁嘅設施,住一晚還勉強可以,要人租最少一個月,真係邊個會租?

  2. 我講嘅或者離一離題,有否留意呢半年左右有間solo office?非常細嘅舖位,除咗正常嘅有美甲美容,同一啲小舖之外,仲有唔少係啲人租嚟住,有沖涼房,包水電三千幾月租。

    現時佢地有北角,銅鑼灣同尖沙咀,我入過前兩者睇過,真係好細。雖然冇版主所述那種差,但個人感覺好唔得幾多。

    香港,係咪真係住唔到人?

  3. 陣間政府又黎活化劏房及太空艙(將佢地對等化),每尺$xxx,(唔係平方尺)咁就真係PK。

發表迴響

你的電子郵件位址並不會被公開。 必要欄位標記為 *