改變香港電視史嘅《天與地》

元旦日播出《天與地》結局篇,投落香港電視歷史上一顆極重要嘅震撼彈。

1. 由呢套劇網上史無前例嘅討論熱潮,周旭明、戚其義嘅目的完全達到,好彩無腰斬,呢套劇嘅精要正係結局篇。一個結局篇,令好多年青電視觀眾醒晒,相信CCTVB再以狗屁不通師奶劇呃飯食落去,一開放免費電視牌照佢就玩完。周旭明、戚其義肯定成為各台挖角對象,特別三個牌照申請人,有線同電盈都唔怕反共。

2. 《天與地》呢套劇係好多細節位穿崩,駛唔駛三十集咁長,我亦有保留。講真,如果英國BBC,可能十集搞掂,依家拖到節奏慢。但都唔緊要,呢套劇基本上完成咗當年甘國亮未完成嘅夢,香港電影有地方係同西方接咗軌,但香港電視唔係。甘國亮當年《輪流轉》都係想觀眾口味接駁番英國果面,當然當年唔成功,但依家大家對電視劇嘅標準睇法,好可能唔同好多。

3. 當然,除咗戚其義同周旭明,我諗陳志雲係關鍵人物,呢套劇2009年9月開拍,12月埋尾,2010年3月陳志雲因威遠行動被人拉咗,跟住套劇一路雪雪到陳志雲2011年夏天重返無線管番節目相關工作,天與地不久由倉底攞番出嚟。成套劇如果無陳志雲支持,同埋攞返出嚟,應該無機會被戚其義同周旭明玩到咁盡。當然,成套劇上上下下,唔計劉丹,睇得明套劇本嘅人,持乜觀點都好明顯。

真正巨變嘅好戲,仲喺後頭。



8 thoughts on “改變香港電視史嘅《天與地》

  1. Martin, 我覺得天與地根本就是Rock Version 的輪流轉。而劇終阿Yan呼喚少女時代的自己回頭更是一絶。先不計execution,單是概念已比很多英劇美劇好太多了。且看近期英國最hit的Downton Abbey, 還不是豪門恩怨爭產炒埋一碟的超豪Soap?

  2. 天與地結局真係好正, 個構思絕對拍得住美國D 劇集
    拍攝手法好有西方味道, 絕對係好好既嘗試

    香港既成功之處在於中西文化交融
    只要創造/堅持自己既風格, 香港電視電影以致其他各行各業都可以成功

  3. 終於明白點解阿爺要禁天與地﹐阿YAN喺ROCK FEST嗰段關於和諧嘅獨白﹐直情係一語中的﹐踩中阿爺要害。:)

    @點子師奶劇/soap opera 本身無問題﹐問題係CCTVB千篇一律拍師奶劇﹐英美電視台拍劇多元化﹐豪門恩怨爭產久唔久睇下都OK。

  4. To 點子:

    喺英國,ITV同BBC嘅劇種好唔同,ITV可以師奶到爆,所以ITV啲Soap Opera,有部分唔係我杯茶,《天與地》根本係偏向BBC嘅風格。我一早講,呢套劇BBC影子好重。

    你依家明點解Daily Telegraph同部分保守黨人想拆咗BBC,被人媽到九彩嘅原因。Based on licensing fee嘅public broadcaster對維持一個社會應有品味有重要作用。

    但我個人睇,Downtown Abbey唔係好Soap,ITV大把師奶十倍嘅(至少無劇應該比得上Corrie)

    To all:

    香港喺拍劇上,係最有可能脫亞入歐。

    我唔係話以往一啲經典唔好睇,但《天與地》係華人地區第一套用西方要求寫嘅劇嚟。

  5. @Martin 唔多同意你所講”《天與地》係華人地區第一套用西方要求寫嘅劇”﹐想當年《壹號皇庭》同《壹號皇庭II》就絕對有美劇水準﹐就算舊年嘅《刑警》都唔差﹐但無可否認《天與地》係近年華人地區少有高水準嘅非師奶劇。

  6. 老共禁播天與地的真正原因也許不在於其64或the city is dying 的政治隱喻,而是劇情提倡個人良知和過去罪孽的救贖,這徧徧老共所不容的,老共最想要的就是每個人都過得齷齪,充滿罪惡感。這樣老共才可以每日攪到你地鬼打鬼,從中奴役你們,所以香港人要懂得,要保留什麼: 良知和救贖,這兩樣東西是大陸再用多一百年都不能企及的。

  7. 我反而對王維基旗下的bbTV有期望,
    王生之前想改革ATV但出師未捷,
    再加上佢以往響IDD界同寬頻界既戰績,
    bbTV如果真係成功得到免費電視牌照,
    可以預期王生一定會有所作為

發表迴響

你的電子郵件位址並不會被公開。 必要欄位標記為 *