聖誕到農曆年去漢城(首爾)自己孭風險

相信聖誕新年,甚至農曆新年期間,好多人會去漢城。以往首爾無咁多人去,但福島核電廠膠成咁,東京少咗好多人去,加上首爾shopping平,咁吸引好多人去掃貨。

但小弟在此提醒各位,去漢城,自己孭兵險。

漢城係好近三八線,而仁川機場就更加近三八線。如果北韓只係以往金正日式勒索,漢城係有兵險,但唔嚴重,基本上係安全。但依家金正日死咗,唔係咁睇。

蘋果喺12月23日頭條係解放軍駐軍平壤,如果係嘅話,已經係等同侵略,同埋證明北韓內部不穩,因為北韓啲友都餓到頂唔順,如果有人起兵叛變,或大規模騷亂,乜事都可以發生,包括導彈襲擊仁川機場、金浦機場甚至市中心,到時唔識乜叫走難嘅香港人,真係膠到核爆。特別仁川機場,肯定係首要襲擊目標,你想坐飛機返香港?咪發夢。

所以,如果你見勢色唔對,係應該考慮改行程,換機票。對新年行程,我個人貼士係,買國泰-港龍嘅仁川入、釜山出機票最實際,有乜冬瓜豆腐,就坐KTX去咗釜山,然後仲返到嚟香港。當然,如果中國捲入戰事,韓港航線應該會全部斷晒。但釜山至少係肯定有得走,就算韓戰聯合國軍打到最差果陣,釜山仍然守得住。而KTX嘅出現,至少電力未中斷,漢城未失守嘅話,高鐵仍然可以帶你去到光州等地區,呢點好過純粹靠內陸機。

亦因為咁,我強烈建議,你有BN(O), BC, 美國、加拿大、澳洲、紐西蘭、葡萄牙、台灣等國護照,你呢次應該用呢啲護照去韓國玩,因為一旦開拖,你喺南韓身份係南韓盟國,或者中立國國民,咁樣你可以被安排撤走,至少英國應該有機會撤去日本先。但如果你揸特區護照入去,你隨時一開拖就係敵國公民,到時你自己慢慢刨《日內瓦公約》自保。



8 thoughts on “聖誕到農曆年去漢城(首爾)自己孭風險

  1. 多謝Martin適時嘅提醒,只可惜香港人一啲危機意識同應變能力都冇,大吉利是一有事就只係識鬧政府唔幫手,查實到時港共政府都自身難保…..

  2. 其實一旦南北韓, 中國局勢影響到香港
    唔討論官員既應變能力, 我懷疑有幾多官員/議員會肯留喺香港同市民共患難

  3. Should use BNO in Korea as in UN view, china is on north Korea side. So don’t be envy to use HKSAR passport!

發表迴響

你的電子郵件位址並不會被公開。 必要欄位標記為 *