睇梁振英敢唔敢玩呢手

選委塵埃落定,泛民手上揸住200張左右選委飛,啲人話泛民超額完成,但實際喺我意料之內,大家有睇我選委投票前一日嘅文章,我寫晒我嘅判斷,不多不少。

但梁振英嘅實力,真係弱雞到我有啲估唔到,會計界由陳茂波操盤,都被兩張實際都有泛民人參與操盤嘅名單玩殘,咁你陳茂波都係跳IFC算吧。依家梁振英得五十幾張飛,邊度有花生食。

餵飛俾梁振英入場無話唔得,但呢個係高難度高風險動作,因為真係咁樣放生梁振英,然後俾埋佢上台,全世界無運行。所以我嘅睇法係,主動俾梁振英飛費時,梁振英上門有求於泛民,亦唔好由何俊仁嚟做談判代表,搵啲本身都有戰略判斷水平嘅,同梁振英談判,特別agreement要開乜term,點樣保證梁生唔走數,唔會做咗陶國能。同埋俾佢入閘,唔好俾佢贏咗,呢啲係要泛民有參謀高手去做。

更何況我睇,工聯會同部分土共會俾飛呢條友,因為香港土共已經可以準備失控,我覺得梁振英唔一定無得入閘,呢個睇土共嘅叛變決心。



12 thoughts on “睇梁振英敢唔敢玩呢手

  1. 推梁振英上最大既收獲就係可以令建制分裂. 去引誘班土共作反, 對香港民主事業絕對有利絛害. 不過有冇人敢博?

  2. 梁振英想玩呢手都唔一定玩得成,
    因要民主黨放棄”陪跑選舉”機會不大。

  3. 如果只送票梁振英, 而無泛民入場, 係極危險動作, 絕對不能做, 風險太大, 因為如果喂晒既話, 咁來緊4 年反對派議題會比梁振鷹食住, 分分鐘泛民民望會過晒去比梁振英度. 而來緊泛民亦會被梁搶議題. 被土共帶番民主派轉頭.

    亦因為咁, 泛民可能喂票比梁既情況係確保泛民保証己經有150 票, 響己經有一個人出選情況下, 將餘票以爭取2017 /立法會取消功能組別等政網形式比梁交換入場, 補佢幾十張票令梁入局. 咁先至有花生看. 如果梁生唔支持2017 普選, 咁佢今屆就係咁先.

    咁樣梁振英就會以”第三多票” 情況下入局, 兩個建制 vs一個泛民, 到時三家亂局, 係中共最唔想見到既情況, 咁先至多花生看.

  4. 凌天羽兄
    土共從白鴿真正以行動宣告投共開始(政改)
    有邊個議題唔係帶番民主派轉頭呢又

    有邊個真心到相信最後所謂泛民會攞全203(好似係)
    依個根本就係泛民捉鬼頭仔既又一好機會

    講真,呢鋪一定要賭(俾餘額要予狼)
    唔賭邊知時運到,唔叫唔知身體好也

  5. 其實如果真係要過票俾CY, 可以由D冇咁”民主”味濃既人過俾佢.
    一定要令CY入到閘, 最重要既原因, 係要利用CY呢條友去突顯特首選舉既不公, 同要利用佢去打散香港富豪同土共呢個不神聖既同盟.
    我唔太認同世澤兄所講, 話工聯會同部分土共會俾飛呢條友. 除非呢班人真係預左同上面反哂面, 否則上面一個指令落黎, 佢地都係要跟. 我亦都希望班土共唔跟上面既指令, 因為咁就顯示到上面內鬥去到一個浮上水面既地步. 對香港絕對係好事黎.

  6. -> 293080
    今晚光明頂(15/12) 就咁啱講緊呢種策略

    將呢50 票用來trade, 正正用來發揮”重要少數” 既意義, 係政治.

發表迴響

你的電子郵件位址並不會被公開。 必要欄位標記為 *