由巾幗梟雄到天與地:意圖扭轉社會走向淪亡之勢

《天與地》果然係一套幾唔同嘅電視劇,同美劇比,或者無線早期嘅精品比,仍然有距離。有可能RTHK去拍,會更加好。只不過,呢套「倉底」可以重出江湖,一石激起千重浪,可以見到一啲嘢。

1. 我諗日後電視史或香港歷史上,對陳志雲呢位受爭議人物,會有好具爭議性嘅評價。新聞部搞到中央電視台咁,佢有責任。但由呢套劇可以攞出嚟播,以至2009-2010年間,播出套《巾幗梟雄》出嚟,RTHK出身嘅陳志雲係有喺改革TVB戲劇上落過功夫,唔可以話佢乜都無做過。《天與地》班底雖然係TVB,但由選角到題材取向,你隱然見到RTHK或者BBC嘅影子喺度。

2. 呢次《天與地》攞出嚟播,係無線歷史上第二次闖關式賭博。我之前博客文章都寫過,蕭若元喺麗的播果套《大地恩情》,令改編自BBC名劇嘅《輪流轉》腰斬,無線以賭片應戰,決定咗香港電視劇白痴化嘅命運。雖然《天與地》收視暫時仲輸俾,可以俾PET樽烏龍茶擺喺古代皇帝張檯度嘅《萬凰之凰》,但如果《天與地》臨尾嘅收視唔差,口碑又好嘅話,至少一啲探討人生課題嘅劇集可以返嚟。事實上,唔駛吓吓都搞到BBC、RTHK果挺咁嚴肅,你要再嚟一套《大時代》並唔容易,走番《壹號皇庭》嘅方向都好唔錯。

3. 《天與地》比《巾幗梟雄》更有號召革命嘅味道,不單為依家嘅激進運動有入屋化嘅平反(Joe Junior果句對白係經典),而且對好多現實問題有好切身嘅描述,包括種票。呢啲都係正面衝擊觀眾嘅思考,本來香港已經係一個火藥庫,而依家有人為扭轉社會大勢,決定賭一鋪亦唔理咁多。

電視劇通常係預見半年到一年後嘅大勢,上鋪播完《巾幗梟雄》,之後就爆發反高鐵運動,同五區公投。呢鋪播完《天與地》,加上香港政治徹底第三世界化,睇嚟2012年嘅大鑊度,係遠超大家想像範圍。

後話:《天與地》裡面,大家可以留意林保怡嘅演出,林保怡喺《壹號皇庭》演陰濕人士已經係好勁。我諗佢有辦法,演出劉江華、梁振英嘅恐怖內心世界。



6 thoughts on “由巾幗梟雄到天與地:意圖扭轉社會走向淪亡之勢

  1. 基本法話大陸社團不可干預香港事務, 現在個個喬裝入來, 某人當選, 喬裝turbo肯定開得好行, 礼義廉鋪紅地煎囉

  2. 林保怡的內憸演技其實是即係無演技,倘若有時間可以看看他早前另一套劇叫九江十二坊,他演技之差可以說是沒有進步,苦情與嚴肅都是同一個樣,這未必叫做內憸,而是表情用盡。
    梁朝偉在色戒和傷城當中的才是內憸的陰沉。不過要與一個康城影帝同佢比,咁又係屈機左少許。
    至於此劇的所謂意識流,當年甘國亮的劇目已經出現了很多。正如澤兄說的輪流轉更是一個經典,可惜當時市民根本理解不到當中的意味才使到麗的「大地恩情」的催淚劇突圍而出。
    後來的「千王之王」的回應是現在大家稱為大導的杜sir做編劇。

  3. 我都因為網上咁大呼聲而睇左天與地,感覺真係好矛盾,大家都因為硬食TBB D 爛劇對電視劇的要求降低到一個超低程度。

    天與地題材上係可取,但執行上卻真係好兒戲,成件事好生硬,劇情亦好多好夾硬。

    不過好奇一問,其實輪流轉改邊套BBC電視劇?我以前搵過都搵唔到,而家見你講我又好奇一問。

    BTW,輪流轉果個年期D 戲真係好睇好多啦。

  4. 好,謝謝。

    嗯,當年甘國亮的幾套其實都係香港電視史上的幾套重要作品

    近十數年的,講真,英文程度唔好的唔好懶怕跟中文字幕,睇英美電視劇好過啦
    美國電視劇再多爛劇,爛的程度都不夠TBB 的咁爛….LOL

  5. 回埋longhair ,
    我都認同,林保怡的演技我真係好有保留
    但我覺得我費事point out 佢,我覺得係成個direction 同production 問題
    成件事個個人講野做的野都硬到死
    d 演技overall 真係好差,冇乜邊個係ok,

    係邵美琪同金燕玲一出來的對白的articulation 就即刻有分別了

發表迴響

你的電子郵件位址並不會被公開。 必要欄位標記為 *