社區廣播計劃:土共佔用大氣電波嘅陰謀

我昨天一早,就去咗參與香港電台節目顧問團周年大會。呢次大會,我無論如何,咁早起身都要去。

點解我咁講,因為呢次係香港電台社區廣播計劃嘅一次重要諮詢。

香港電台視像記錄

政府為塞市民要求大氣電波嘅訴求,要香港電台劃出部分數碼廣播時段,俾民間團體自己搞廣播,名曰社區廣播,本來係好事嚟。

呢個plan,我睇就知唔多妥,因為認真做針對少數族裔之類社區廣播,好可能要搞出類似澳洲SBS咁大嘅龐然巨物出嚟。而用社區呢兩個字,土共就會理解係「十八區廣播」,俾十八區區議會把持時段好大可能結果,就係被班hihi霸用嚟宣傳佢地「成功爭取」嘅功績,或者播出嚟嘅嘢,係民建聯嘅政治宣傳。之前我出席過focus group,己經知道單嘢有幾大鑊。

所以我係有備而來,爭取首個發言,就係要杜絕土共dominate個討論,我侷住要將呢個「社區廣播」set做一個比較非政治化嘅frame。而大家睇番片段,尹才榜(工聯會)、李桂珍(民建聯)兩件土共,堅持要搞十八區廣播,所以我最後發言,好唔客氣咁叫佢地死咗條心,我上嚟就係捍衛公共廣播,就係咁解。如果唔出聲,就會變iProA藉資助上網計劃抽水嘅事件重演。

而在座蔡子強同吳敏倫,都講咗成個計劃會變政治炸彈,例如土共化身n個民間團體嚟申請入紙,或者同性戀者入紙廣播會被ban,總之呢劑嘢極度麻煩,十二月有公開文件諮詢公眾,大家一定要踴躍發表意見。

成個會議,另一個好無恥,就係代表過土共出戰嘅梁兆棠(教育界代表),未聽過黃克廉(教協代表)講嘢,就亂咁鬧有人無為教育界講嘢,自己遲到就咪咁多聲出喇。

後話:香港電台節目顧問團,你委任得我,我就要做嘢。我係對照BBC Trust Audience Council嘅職責去做,當然我有傳媒工作背景,但有啲太離譜嘅狀況,我會唔迴避用我嘅title嚟出聲。




4 thoughts on “社區廣播計劃:土共佔用大氣電波嘅陰謀

  1. 睇完副處長講社區廣播係開放俾差唔多有乜野社會服務團體,再加上中共人民台又係香港出聲,第時香港無日安寧。

  2. 開放大氣電波是頗多市民的訴求,政府若要香港電台劃出部分數碼廣播時段,俾民間團體自己搞廣播,名曰社區廣播, 那為何不正式發牌給亞牛的民間電台? 此台在屢被打壓及多次被沒收器材下, 仍頑強的堅持了超過六年的公民抗命, 目前仍在繼續廣播. 可有人畧作解釋嗎?

發表迴響

你的電子郵件位址並不會被公開。 必要欄位標記為 *