報業大戰再臨

肥佬黎參戰任何媒體都會風雲色變,佢入嚟打免費報當然亦唔例外。

1. 唔講內容,肥佬黎呢次打免費報大戰本小利大,佢本人喺台灣有免費報經驗唔駛講(《爽報》好早有台灣版),更重要係,肥佬黎代印AM730呢段時間,為佢投資大量印刷機同白報紙提供咗資本。而勤力德代派頭條同晴報,亦積累運作免費報必須嘅物流經驗,加上啲人嚟自蘋果,所以肥佬根本無嘢蝕。

2. 佢呢個打法,好符合我叫「佐丹奴買布法則」,肥佬黎買布料同定款式嘅精打細算,係全製衣界出名,亦係日本、歐洲其他同行學習典範(盡買可以轉售嘅基本款式布料,個款唔好賣可以即刻向同行拋售布料,咁唔會蝕),如果你唔知肥佬黎呢方面哲學,買《事實與偏見》返去刨吓,再喺製衣界做番兩三年你就明。

3. 肥佬黎真係value added係報紙配合語音讀報,我諗遲早有動新聞跟埋入嚟,佢一炮過食晒早上電台聽眾,同埋免費報啲廣告落肚,果吓係佢最恐怖嘅戰略企圖,所以呢次大戰係禍延電台,但商台等似乎未知一個比鄭大班更得人驚嘅人,已經喺佢地門口。

4. 喺咁多份免費報中,查實最唔駛驚係《AM730》,因為《AM730》以質取勝,特別喺培育年青專欄作家,好似周澄等,係其餘果幾份免費報唔會做。《AM730》係一份有收費報質量嘅報紙,但免費派出去。六份報紙廝殺過後,剩番可能係《爽報》同《AM730》。你見到《爽報》竟然搵香樹輝嚟寫,就知無可能擊敗《AM730》,甚至話唔取消《AM730》印刷合同,係俾定心丸,因為肥佬黎要持續投資印刷機同白報紙,絕對唔少得施永青幫忙分擔吓。

5. 呢次大戰最大煲,除咗內容一向垃圾嘅《頭條日報》,當推依家走通俗路線,《蘋果日報》以外所有通俗小報,小弟相信東方報業集團可能被迫將《太陽報》免費化應戰,因為對生活越來越難嘅基層民眾,如果一份《爽報》夠晒佢地一日嘅話,係無必要另外買報紙。所以有質量嘅報紙唔駛死,但平日唔係做開質量嘅,就準備全部被人劏清光。

6. 你話今日睇成份《爽報》,我話成也陶傑,敗也陶傑,陶傑寫咸古絕對係賣點,因為文筆同意象佢絕對係高手。但搵佢真人發聲讀咸古就完全破壞晒成篇咸古嘅意境,佢把聲可以做talk show,但唔可以讀咸古。唔該肥佬黎快啲搵把適合嘅聲去讀,否則大家只會將佢係明將壽司嚟挑戰。

當然肥佬黎到底想點打,未來仲會改,請記住,肥佬黎係用trial and error方式去管理傳媒,佢要跟市場反應去改,快如閃電。



7 thoughts on “報業大戰再臨

  1. 不知為何被吃掉了些字

    我是這樣看: 一日有阿婆, 一日免費報紙市場都唔會飽和

    晴報應該會比頭條先死

    頭條有強大後盾(暫時舊四報廣告商最多係),
    晴報, 和他的母體經濟日報冇
    都市應該不會死, 其瑞典總公司策略是絕對不會讓他撤離地鐵的
    AM730轉型做收費報每日印 5-7萬份 + 網上全內容上載最好

    而爽報的策略似乎是找些未開發的地方派, 如大學校園, 巴士總站(和城巴有合作?), 或者有作為

    PS: 本人居住的大廈樓下無爽報派, 但有頭條和晴報… 難道… (這是民X聯影響力極高的屋苑)

  2. 合約精神,之前幫AM730印夠 100頁係人情,我同意。但係正如施永青呢兩日係 C觀點話,無得多印,無位落多廣告,對佢地收入有好大影響。你點睇?

  3. 直頭笑到縮陽啦….

    不過話時話,730印務糾紛對於730自己,
    仲有肥佬黎對分擔印刷成本方面影響如何?

    頭條同都市都有鐵路車站獨家派發權,
    情況又真的是否這樣差?

  4. 肥佬黎係短期內唔能夠多幫AM730印,但長期,爽報同AM730印刷量都可以滿足到。

    因為爽報路線同AM730好唔同,而肥佬黎唔可能俾生產設備100% full load,一頭半個月無所謂,你長期100%或90% full load,就一啲位都唔俾自己走。

    肥佬黎會投資多一兩條,甚至三四條印刷線,依家MAN Roland嘅設備,做到每個鐘60000 - 90000嘅印刷量,肥佬唔會蠢到自己爽報食晒個量,咁樣無穩定收入投資就too risky,所以AM730如果會維持依家印刷量同紙數,甚至更多,咁肥佬就敢投資,至少佢唔會食晒所有印刷投資錢。

    正如有啲製衣廠,除咗做自家品牌,有時亦會做埋OEM,越機器同資本密集,越會咁做。

  5. 講開施老闆連日0個種小家敗氣無理取鬧,直頭想做高登本月之星,臨老獻膠又何必?

    合約一清二楚,肥佬黎難道有天職,要保證施老闆廣告收益?試下搵腥島,睇下幫唔幫你條滿口道義地產佬印0野?

    AM730一直有睇,內容質素本來有力競爭,施永青無聊出口術,適得其反拖累形象。

發表迴響

你的電子郵件位址並不會被公開。 必要欄位標記為 *