博客賣書

大家見到喺上面會出現Product Pages,因為小弟打算做個試驗,就係喺博客賣書,先賣自己同埋好朋友嘅書,遲啲再推廣到自己推薦俾讀者睇,Amazon又無得賣嘅書。

呢個博客,單靠Adsense查實己經做到現金流上收支平衡,兼有少量正現金流,所以唔係Hosting錢問題。有讀者問小弟能否以優惠價賣自己寫嘅書俾佢,並且寄過去。如果用人手做,就會頗為麻煩而無效率,特別海外讀者嘅金流問題,根本係解決唔到嘅。而自己既然搬番嚟自己嘅Server,咁不如裝個plug-in賣書。

另一方面,依家香港做出版社都幾痛苦,睇聯合出版集團面色做人會死,但二樓書店始終局限係一個唔夠大嘅餅度,所以小弟嘅宗旨係做大塊餅。其他作者可以利用自己經營嘅博客社區,利用Wordpress plug-in自己賣書,亦可以指過嚟設有書店功能嘅友善博客度銷售書本,咁樣應該可以令到出版社、讀者以至作者達致三贏局面。喺電子書平台未普及前,如果一個博客經營有過千讀者嘅社區,當中唔少人喺網上買書,應該可以做第一版唔駛蝕錢嘅水平。

賣書功能會喺測試妥當之後至會啟動,初期應該只會賣自己有份寫嘅書,同埋Rachel嘅書,因為我唔可能有太多人手處理物流問題,但如果日後情況許可,可能會其他人嘅書陸續喺書店出現。互聯網可能係文化產業另類出路,視乎你點做。


One thought on “博客賣書

發表迴響

你的電子郵件位址並不會被公開。 必要欄位標記為 *