英國嘅世代之爭

無乜新聞事件可能需要成年嚟討論,但英國騷亂可能係例外,因為英國騷亂暴露咗一啲以往著墨不多嘅問題,依家浮晒上水。而呢啲問題,可能我地香港人睇得比英國人更加透徹,呢個問題係世代之爭。

依家如果仲有人話種族係引發騷亂嘅話,我相信結果係果條友被人丙到阿媽都唔認得。無論親工黨嘅衛報,到反移民到爆嘅每日電訊報,都承認一點,就係好多移民係騷亂受害者,甚至好多人走喺第一線捍衛社會安寧,事實上,呢次拉咗好多都係白人,打劫馬來西亞留學生果幾件MK型物體,有幾件係白種人,就己經講明一切。甚至衛報讚揚Tariq Jahan,即係果位喺伯明翰死咗個仔嘅不幸父親係愛國者,呢班友正係BNA 1981想阻住佢地嚟嘅人之一,己經講明好多嘢。喺呢次騷亂後,再有政客敢怪罪少數族裔,恐怕果條友只會被認為係姓賴。

而cut budget cut出膠,兼且卡梅倫係廢柴,亦都好清楚,由內閣閣員去到地區巡視被人當不受歡迎人物處理,以至民調結果都睇到,MET嘅民望仲高過David Cameron同Boris Johnson呢對孖寶,而警察好似同工黨企埋一齊咁,你就明依家保守黨有幾牙煙,保守黨有好多口才一流,但做咗膠嘢唔找數嘅人,明年倫敦市長選舉,Boris Johnson準備打場超級硬仗都得,佢阻唔阻到Red Ken條癲佬上場,睇佢運氣。

但有個問題,英國社會應該同香港一樣未準備好處理,就係世代之爭,睇番8月9日BBC Two newsnight果段辯論,大家可以睇到呢個問題有幾尖銳。

BBC己經力求持平,搵咗一個Rap歌手,一個好熟英國街頭情況嘅學生,一個太陽報前編輯,同一個反對街頭暴力案件嘅母親組織代表嚟分析件事,當個學生答嘅時候,話社會幾咁不公,令年青人氣餒嘅時候,果位母親組織代表忍唔住氣,一味鬧學生,Rap歌手唔啱唔啱唔啱,無諗過聽佢地講。

依家個問題喺度,英國中年以上人士,認為年青一代太自我,價值觀念錯亂,走去做暴徒,但年青一代覺得,你班友搞到英國一團糟,不知所謂,你地唔駛找數架。呢次上街搏懵,乜階級都有,乜種族都有,乜職位都有,連奧運大使都有,連會考9A都有,階級同種族都唔係問題,但取而代之,係當權呢代人,同依家十一歲到四十歲嘅普通英國人,根本對唔到嘴,呢個成為未來社會爭論焦點。

而David Cameron條友唔理民情嘅白痴,連學中國shut down BBM呢類膠橋都要學,就更加會令佢好麻煩。Boris Johnson唔係咁多人認為佢做good job,但民意負值無咁大,因為大家信佢努力過,但David Cameron唔係。佢唔知時代在變,亦唔明依家年青人焦慮啲乜,一味諗住送人去監獄,乜英國監獄管理好好咩,未金融海嘯都試過膠到監獄騷亂兼走犯,我可以講,咁多無晒前途友仔入監倉,監獄唔夠funding又擠迫,就保證又會有膠事發生,根本係唔會解決問題。呢條友繼續做首相,而英國唔同世代嘅人,如果無辦法對話嘅話,經濟越搞越衰嘅時候,呢類騷亂係無日無之,直到英國社會有共識為止。

唔好諗住工黨上台有改善,呢班友派錢就叻,但依家嘅工黨,唔似有Tony Blair呢類人可以領導英國面對呢個局面囉。



21 thoughts on “英國嘅世代之爭

  1. 英國嘅法院開夜庭去判D年青人有罪,偷2支水(價值3英鎊)都坐3個月監.

    首先,連監獄都cut budget, 佢地點招乎多D犯?
    二,你判佢3個月,佢地真係唔會反抗?佢地唔向入面玩野,佢地等你倫敦奧運會先玩野,你仲頭痕.
    三,判3個月/半年監,真係解決問題?點解佢地”Nothing to do, nothing to loss”?你班金融精英炒沙炒石炒到國家出錢救亡,跟往又話無錢,大學學費由1000鎊加到9000鎊,年青人失業率去到20%. 同香港世代學說作者所講,第四代,註定失敗嘅一代.

  2. 隨著人均壽命越來越長﹐歐式 cradle-to-grave 福利主義結構性入不敷支就越來越嚴重﹐個煲遲早都會爆﹐金融海嘯只不過抽乾咗好多水﹐令到個煲早啲爆﹐但唔等於冇金融海嘯個煲就唔會爆。

  3. 午餐從來要有人付鈔,社會福利以至公共開支,肯定亦與政府財政,經濟景況息息相關,美帝先至可以喪發公債,濫印銀紙數冚數,拖全世界落水,英國何時淪落為一旦緊縮開支,就大把人發窮惡爛渣的褓姆國度?

    族群矛盾,世代對立,政府當然責無旁貸要妥善解決,只不過殺人放火打家劫舍,若美化為新生代「抗爭」,拖拉輕恕,恐怕後患無窮。

    記得一代名相戴卓爾夫人上台,一樣大幅縮減社會福利,厲行私有化,當初同樣被人咒罵,民可以樂其成,問題係社會有無絕望。

    1. 問題係,David Cameron絕對唔係鐵太。

      同埋鐵太嘅私有化政策,有個好大後遺症係英國工業基礎大削。

  4. To:義不容共
    奧巴馬個左仔除左發公債,印銀紙,冇計可施,現在只剩把口(演講,而且要有提詞器的前提下)

  5. 其實最大問題係好多工作的薪金係唔足夠過世. 而好多「高增值」產業既產出係唔足夠支付社會成本 呢廿零年既繁榮掏空咗發達國家既社會資本. 人力儲備係on9既行業

    所有有眼睇既青年人都知道. 呢一條係一條死路. 好多人唔會有命活到攞到退休金果日. 而退休金也會在你退休前全滅.

  6. 扣佢地緩助金,同趕佢地出公屋,就可以解決/懲戒佢地?
    一人犯罪就一家授罰,就係當下英國國情.

    http://mingpao.feedsportal.com/c/33528/f/585670/s/175959e5/l/0Linews0Bmingpao0N0Chtm0CINews0C20A110A8130Cta6160A0Aa0Bhtm/story01.htm

    英國倫敦騷亂,一名18歲疑犯上庭後,他與母親面臨被驅逐出公屋。
    大倫敦旺茲沃思縣議會表示,他們已向該名婦人發出搬出通知,並正式向法庭提出申請,將由法官判決。

    如該名母親與她的兒子被驅逐出公屋,將成為首宗個案。

    英國警方已拘捕17000人,涉及不同城的騷亂。英卡梅倫首相曾要求嚴懲示威者,將他們驅逐出公屋。

  7. 英美工業基礎大削﹐主因係勞工成本過高﹐而勞工成本過高係因為六七十年代左派當道時﹐工會同左派政黨(英國就係工黨﹐美國就係民主黨)勾結﹐令工會坐大﹐工人嘅薪津福利大幅提升﹐開始時還可以﹐因為工業外移唔可行﹐但到了九十年代﹐隨著通訊科技嘅發展 (互聯網除咗改變人與人嘅通訊習慣﹐同時亦開闢咗以前唔可能嘅商業合作方式﹐因為產品設計同生產過程有地域限制﹐而互聯網就將呢啲界限打破﹐試想想﹐冇互聯網﹐iPhone咁複雜嘅產品點可能美國設計中國生產)﹐而發展中國家開放市場引入外資發展工業﹐發展中國家勞工成本有好大優勢﹐工業外移嘅趨勢就一發不可收拾。

    私有化無疑令到工業可以外移﹐但就算唔私有化﹐過高嘅勞工成本亦只會令到產品冇晒競爭力﹐英國內需市場唔夠大﹐到時工業基礎一樣會大削﹐唔大削﹐政府就要長期泵水﹐未到金融海嘯早就乾晒塘。

  8. 「依家如果仲有人話種族係引發騷亂嘅話,我相信結果係果條友被人丙到阿媽都唔認得。」

    陶傑尋晚岩岩講完,睇頭條新聞睇到我打個突。佢竟然拎「警察通緝照多黑人」和「打掃相少黑人」黎「證明」呢個係種族騷亂,完全把種族歧視導致這些現象的可能視如無物。

  9. 其實一切問題, 將臨的起義早己經寫過.

    但, 胡亂用重刑係最危險既事. 中國亦曾經有過重刑時代, 但係無用, 社會腐敗, 犯罪率唔會因刑重要減少,

  10. To 方潤:

    又引證陶傑嘅老問題,平日唔做功課就俾節目出街。

    如果有睇番晒啲英國傳媒報導,twitter內容,絕對唔會指向種族衝突呢個結論。

  11. 過高的勞工成本, 不見得一定使競爭力大減, 否則Airbus, Siemens, Bayer Healthcare, Alstom呢類公司就應該係負累, 而唔係經濟動力

    outsourcing而家變成強弩之末, 1972年世界貨幣取消金本位制之來, 油價拾級而上, 全球供應鏈風險及成本攀升, 新興國家人工平, 但係船運空運成本上升抵消, 而且新興國家基建落後, 如印度, 經常停電又缺水, 舖設寬頻又貴又困難重重, 係中國, 基建較好, 但係政府及民間spy處處偷技術, 慳粒糖, 輸間廠, 值唔值呢? 留係中國唯一既理由就係中國的龐大市場, 但係中國內需市場疲不能興, 他日中國市場一朝變成一個海市蟹樓, 外資便會撤退

  12. 無啦啦俾幾十萬低技術人口變香港人,我唔知會點呀吓。

    我淨係知英國工黨班冚家拎一方面任由大量低技術移民湧入,又大幅增加福利,搞到低技術工全部由人工幾低都會做(講緊低過最低工資)既新移民做晒,本地冇學歷既年青人就只會攞綜援,因為啲人工俾人搶低晒,攞綜援生活仲好過打工。

    呢幾日睇衞報,班左膠講到班四圍大肆搶掠既人其實有幾咁慘,佢地其實又係對社會既抗爭,順便又話可能係年輕人見到banker個個幾百萬bonus不滿。戇鳩。只要你喺過英國住一排,仲要住喺公屋區左近,就會知呢啲班俾左膠縱慣年青人係幾咁廢幾咁廢。

    鬼唔望下次班仆街又黎多鑊放火搶掠,但就轉移陣地去中產左膠大本營(hampstead, islington 等) 姦淫擄掠,睇吓班左膠仲有冇心情抽水抽得咁過癮。

  13. 政客唔做嘢唔緊要(如boris Johnson),只要唔食碗面反碗底,事事都同大部份選民利益對着幹就得。左膠如ken livingstone事事同選民利益對着幹,如新移民蝗蟲問題,地鐵工會年年人工加幅高過通漲仲要罷工嘅問題,穆斯林法西斯式強迫其他人接受其超保守社會意式型態嘅問題,佢所發表嘅左膠獨特見解,只會受選民懲罸。

  14. 講起英國穆斯林,有極端穆斯林係數個英國城市張貼告示,聲稱建立了伊斯蘭宗教法執行區域…………呢個又係左膠縱容之下既結果

    1. 英國佬無法國佬果種適當時候強硬就強硬,法國都係左翼橫行嘅國家,但係戴高樂主義下,回教法唔可以亂嚟。

  15. 法國總統沙高斯之前係做內政部長, 2005年巴黎市郊暴動, 佢親自走去市郊家訪同埋鬧班暴徒垃圾, 要用Karcher(高壓清潔劑)黎噴班暴徒

  16. “只要你喺過英國住一排,仲要住喺公屋區左近,就會知呢啲班俾左膠縱慣年青人係幾咁廢幾咁廢”

    Agree.

發表迴響

你的電子郵件位址並不會被公開。 必要欄位標記為 *