用街坊角度去睇番天星問題

雖然在中大政政系四位我最敬重老教授(關信基、鄭赤琰、翁松燃、李南雄),我同Dr. Cheng好多睇法應該分歧最大,但我對他一向敬重,除了他是我研究南洋問題的啟蒙老師,他敢用街坊語言來講解政治更是獨創一格。我常說,如果我日後功力夠,一定會寫本俾街坊睇的《師奶政治學》。而Dr. Cheng寫的《養狗政治學》同《釣魚政治學》,是我好建議大家睇的入門書。

閒話休題,在《獨立媒體》網中,用左好多好知識份子的語言黎講天星碼頭呢個問題。或者我用番好粗淺的街坊角度,講番天星以及公共空間的重要性。

首先講人民規劃先,簡單黎講,人民規劃就係屋係大家住的,咁間屋點裝修,應該大家有份傾。如果唔係大家有份傾,就唔會經常有一男一女,興緻勃勃對住IKEA果本catalog口沫橫飛。IKEA個網站都提供簡單軟件,俾你規劃下個衣櫃,成個城市大家住,但係規劃只係俾班只顧搵錢,唔顧好唔好住的地產佬定,查實點岩數?

至於公共空間,查實係個城市應該有番些空間。客廳放滿雜物的結果係乜,就係你唔想返屋企,因為屋企無乜空間。而商場迫到死代價係乜,就係一般人唔多想行(除左腦場,但腦場係賣零件,你唔會下下都響腦場呢類令人缺氧的地方消閒卦),租價自然低。所以租金比較高,賣些一般百姓買唔起的野的商場,都有好充足的空間,PP1期就係好例子,有地方俾你坐下。大家認為太古、置地管的商場好行,定係長實的?公共空間,就係令大家好住番一些。

當你用一個間屋舒唔舒服的角度黎睇香港的城市規劃,好快你會發覺呢個城市的規劃只能用黐線黎形容。

發表迴響

你的電子郵件位址並不會被公開。 必要欄位標記為 *