解決立法會粗口風潮關鍵在曾蔭權

成個立法會粗口風潮的討論,當中的邏輯混亂程度,真係只能用全世界膠埋一碟來形容,現時我分幾個點重申一下立場:

1. 英國國會下議院(House of Commons),甚至上議院(House of Lords)都唔會點管議員言行,有時有啲例如Shit之類嘅字都照出街,只不過如果你喺議會辯論係又講粗口,唔係又講粗口,係被人恥笑咁解。范徐麗泰講,以幽默代表粗言穢語,係英國國會傳統,不過呢,點解范太做立法會主席果陣,又唔學英國國會下議院果啲Speaker咁,由得長毛喺度係又抗議,唔係又抗議,吓吓都趕人出去,佢應該為今日硬膠嘅局面負責,唔係脫咗逃就講風涼話。

2. 依家成個粗口風潮最關鍵,係行政長官曾蔭權公然喺議會爆粗,仲要果句真係粗口諧音嚟,而立法會不單無趕特首出議事廳,仲要文過飾非,曾蔭權依家仲過份到話自己走音,咁佢點解兩個月後至認走音,佢原本係想過乜,以及走音講果兩個字係咪9up,當眾講大話比當眾講粗口,惡劣成千倍,點解咁又得?

3. 依家如果曾蔭權承認自己膠咗,並當眾道歉,咁社民連三子講粗口落去就無晒ground,就係咁簡單,你曾特首一日唔道歉,一日都會為社民連三子講粗口提供合理性,罪魁禍首就係佢,除非係咁,曾特首根本係另一個Laughing哥,社民連的臥底,咁另計。各位土共抽水前,查清楚曾特首係咪社民連臥底先。

後話:我知部分土共,已經意圖出兵抽水,包括《明報》李先知,以及有位唔識寫股學人寫股評出書嘅茂利,呢堆抽水黨再亂咁抽水,咁大家應該準備令佢地抽鏹水。

3 thoughts on “解決立法會粗口風潮關鍵在曾蔭權

  1. 我相信社民連認同你ge睇法
    毓民都講左如果曾、唐道歉
    佢地就會道歉,以後在立法會亦謹言慎行

    同上次掃枱相比,今次主流傳媒表現更差
    除左《信報》略有報道社民連立場
    其他傳媒唔係亂”嘟”(電視:連狗官都嘟)/”x”(報紙:仆街都要x),就係空群而出抽水

    最離譜係原來香港唔係講道理ge地方
    今日徐詠璇寫左一段長毛解釋”仆街”唔係粗口ge原因
    但下一句就已經係: 公道自在人心,拋書包文過飾非係無用,再順手鬧長毛仲停留o係teenage階段,以講粗口發泄為傲之類ge廢話
    原來乜都唔使討論,只要政府出句聲or徐詠璇自己覺得乜野係粗口,o個句就係粗口,就係立法會唔講得ge野

  2. 根本傳媒呢鋪係集體無恥,在政治上,講大話係極大罪,一如克林頓被Starr追殺,唔係因為佢同萊溫斯基在白宮胡天胡帝,而係作假證。

    香港真係進入黑白不分的新時代。

  3. 我又唔覺得,香港本來就是黑白不分。很多香港人並不認為講大話是很嚴重的事,否則自己怎會常常講﹖

發表迴響

你的電子郵件位址並不會被公開。 必要欄位標記為 *