U盤之亂總結

依家未知證監幾時開會批准港交所修改《交易所規則》,停止膠到無朋友的勁假時段。不過,亦都係時候,對U盤之亂作出一個總結。

雖然HSBC 3月9日大屠殺令公眾察覺U盤之亂不解決不可,但整個U盤之亂,由去年五月至今,實際損手爛腳嘅股民人數都唔知點數,而小弟初步總結各方喺呢次亂事中嘅責任:

1. 港交所:由2007年搞諮詢到依家,成個U盤設計都不知所謂,雷曼迷債未必可以先做一次數學模擬,但U盤可唔可以玩嘢,小弟睇吓啲盤,自己用我個豬腦都諗到,人地國家防止有人玩嘢嘅配套,香港就乜都唔整,係咁亂嚟,仲要搞成班大行唱好的所謂諮詢,衰過廿三條果陣嘅假諮詢,港交所由董事到行政人員都係飯桶嚟。

2. 證監會:班友批港交所《交易所規則》申請果陣,完全發緊夢,之後日日都有膠trade發生,都係發緊夢,定係有人立心唔做嘢就不得而知,一定要查。

3. 投資者:呢次U盤之亂對好多小投資者教訓係,好多涉及交易規則嘅諮詢文件,一定要主動參與同發言,甚至要求衝上去立法會的Panel講,一如IT界人士嘅習慣,因為呢啲交易規則隨時定閣下身家性命財產嘅生死,點解學投資往往要學埋統計同概率,除咗用嚟推算個市嘅走向,不同嘅combination以至規則,都會有唔同可能結果,果啲大戶好多時係喺數學或統計上搵到loophole去屈機。呢鋪U盤少咗個隨機收市,結果就被人裝彈弓。

4. 政府:乜都無做,我想問大家交股票印花稅嚟做乜。

唔想變大戶點心,除咗唔好信果班除咗識冚把就乜都唔識嘅財經演員,了解遊戲規則,同埋參與遊戲規則嘅諮詢係極為重要。香港投資者學會得閒同X建聯搞埋晒不知所謂民調,問有幾多人會供匯控,係有心嘅,唔該睇吓個市幾離譜好唔好?

4 thoughts on “U盤之亂總結

  1. 我真係唔明點解香港人咁信果班財經演員,永遠事後孔明。Like Warren Buffett said, “Wall Street is the only place that people ride to work in a Rolls Royce to get advice from those who take the subway.” 香港亦都一樣…

發表迴響

你的電子郵件位址並不會被公開。 必要欄位標記為 *