競價時段的loophole

小弟奉勸港交所諸公,推出任何新措施前,請搵個人做吓「debugging」,修補晒所有loophole至好推出,否則遇上丁蟹就真係好膠。

好似收市競價時段,本來目的係防止大戶操控,總之能夠達成最大成交量的價格,就會係收市價。競價時段頭八分鐘係輸入,尾兩分鐘係俾修改,但唔俾入限價盤,之後對盤。

好啦,睇落好完美,但如果恆指有成份股跌得差唔多,有大戶有Cash又有貨,例如我手上有一千萬股HSBC,又有足以俾一千萬股HSBC的Cash,我搵A行用個超低價入個賣盤,之後搵B行或一堆行接貨,查實係左手交右手,咁就可以操縱股價。當然操縱股價真正目的係操縱恆指上落,在期指度賺番筆。

在設計競價時段果陣,HSBC成一百蚊一股,根本係好難做,但HSBC公布業績後,因為股價跌得差唔多,咁大戶就可以玩呢類近乎超技術交易。今日HSBC香港竟然以33收市,競價時段跌成四個半,大家指責好多盤來自德銀,大家有無諗過,真正可能有人利用呢個loophole玩緊膠?只要我有數據,知道大約最大成交價係乜Volume就得。

上周五有人入33元的玩嘢盤,好明顯係牛刀小試,大家唔知呢個loophole,所以周一結果來個大屠殺,反正貨在這位大戶手,錢都係。港交所呢班膠人,係唔係應該廢咗競價時段。唔好以為六月限制價錢後會無事,如果你個市場有漏洞,要玩膠始終有人玩到膠。一如花旗2004年的經典交易「Dr. Evil Trade」,利用歐元區的債券發行漏洞玩到全歐洲各國膠晒,明知依家金融市場有唔少玩膠高手,有loophole唔即刻填,咁港交所係唔係應該早日收工,我依家好贊成打破港交所壟斷,由呢班膠人養尊處憂,遲遲人人被玩永不落空。

6 thoughts on “競價時段的loophole

  1. 第一,自動對盤並唔意味買賣都動入你手中,你同時買同賣一千萬股,但人地肯用 37.1 買,你要賣一千萬股出街,分分鐘只有你賣而無盤畀你買。

    第二,呢個價值問題同睇單車追逐賽一樣,所謂單車追逐賽,就係每第五倍圈數(五,十,十五等)計邊幾個領先有加,去最後唔係睇邊個最後番終點,而係睇邊個分數最多。單車一定有有人衝,但係仲多人根本唔係玩,只係做電耗。股價,本質上係呢的衝分位,三點幾多錢根本無人睇,因為唔係搶分位。由最有衝刺力人士(即係大戶)決定點衝分根本係最公道。

  2. 個買賣唔係完全由自己友達成都無問題,最緊要係個收市價,因為只要自己提出的價可以有最大的交易額,咁樣就可以藉操作個收市價做好多嘢,例如衍生工具果度劏一堆人,或者恆指期貨賺一筆。

    如果照你的看法,操控收市價的行為係唔係應該合法化?

  3. 其實最重要係殺牛證當中可以賺幾多錢,因為造一日U價,第二日一開市就收復失地,一D作用都無,如果唔係殺牛可以賺錢,又可以點賺呢三億成本?

    另外我唔係話操控收市價合法化,而係無論市價點定都會有人去「壓線」,以前未有競價時段,咪一樣有人做最後幾個交易「壓線」?同埋,「壓線」同造市完全係兩件事,造市係指製造假既流通量,左手交右手,所殺既係即場戶,壓線係真金白銀「迫人賺錢」,派一千萬手平貨出街,對即場戶無傷害,受傷既係睇一剎那等於永恒果批牛證同孖展,令價格失去公信力,而唔係令價值失去公信力,兩者差異好大。

  4. 但係過咗16:08只有order without price limit 先可以出到市場排隊,咁好似星期一咁last果幾百萬股既大盤,你只可以知自己個盤可以整低hsbc個價,但你唔舍知會低到去乜野位wor...係咁既情況下又點可以保證成文交價就係自己想做個價呢?

  5. To Ivan:

    所以個價要低得夠離譜,同埋要用統計方法,大致上掌握自己要做幾大的Volume,去「擊敗」其他價位,達到造市的目標。

    所以唯一防止呢類屈機情況的方法,係系統隨機收市。

  6. 網主,人地唔係出左個低價,而係出不問價沽,出左成十一球止蝕盤,就算人地出價1仙1股都要照賣,即場睇住部機都無得造咁準。

發表迴響

你的電子郵件位址並不會被公開。 必要欄位標記為 *