黃永衰啲乜?

據《星島日報》報導,廣管局對成棚IO對黃永的投訴,認為表面證據成立,已經將個file擲去投訴委員會處理,而下月投訴委員會會議, 會請黃永上去解畫。

在商台做過十個月獨立監察員,對黃永被要求上去廣管局解畫一啲都唔意外,因為表面來看,黃永話要貼訃文去人地office,明顯違反《電台業務守則-節目標準》的7(b)條。

7(b)條文內容係咁:

(b) 可能導致任何人士或羣體基於民族、國籍、種族、性別、性取向、宗教、年齡、社會地位、身體或心智不健全等原因,而遭人憎恨或畏懼或受到污蔑或侮辱的材料;或

廣管局:電台業務守則-節目標準,2006年11月版

這條條文的精神係,如果有人因為佢嘅身份,而被人憎恨, 或者受污蔑,或者受侮辱,就可以入罪,而黃永嘅言論,指名道姓,擺明搵個別新聞官出氣,要貼訃文在新聞官office門口,明顯係因為受辱果個人的新聞官「社會地位」而中招,換言之,7(b)條已經犯咗。

呢鋪我睇黃永就算道歉都好,都好難甩身,因為佢近日至道歉,未有在公眾感到憤怒果陣第一時間道歉,廣管局絕對有權質疑黃永的誠意。依家睇係勸諭,強烈勸諭定警告,我諗唔會釘牌,不過被罰款係有機會。始終係節目總監犯規,等於報紙總編輯寫咗誹謗文章一樣,係罪加一等,廣管局好難唔有所行動。

當年梁文道暫代鄭經翰主持《風波裡的茶杯》果陣,係暫辭節目總監(台長)一職,由Channel Manager暫代台長行政職務,就算營運總裁蔡東豪開埋咪,亦都係好多考慮,一方面怕被誤會係商台立場,另一方面,如果不幸踏中地雷,作為管理層踩中的話係好大劑。我都知黃永初一講樹,十五講敬老係有一定政治盤算(叫黃永講敬老果位係高人嚟),一如當年鄭經翰封咪後,《風波裡的茶杯》定議題個委員會,都有自己的agenda,就算鄭經翰都有佢嘅agenda,問題係你有agenda還有agenda,但校炮唔好走火,今鋪打到走晒火,真係想幫都幫唔到。

2 thoughts on “黃永衰啲乜?

  1. 不過唔知到時黃永被人罰, 又有冇人走出來大大聲話言論自由被侵犯呢? 還是小心d好

發表迴響

你的電子郵件位址並不會被公開。 必要欄位標記為 *