垃圾部門,垃圾文件

近排膠事數之不盡,特別是政府製造出來的硬膠。先打劑無咁膠,今晚就打劑勁膠的。

有一個政府部門的局長,我認為這個人根本是垃圾,送去堆填區就差唔多,呢位就係政制及內地事務局局長林公公。近日因應高等法院司法覆核判決,急急草擬的《有關在囚人士投票權的諮詢文件》,可謂呢個部門垃圾文件的其中一份「精」品。

1. 首先,一如其他政府硬膠諮詢文件,果些同外國政府的比較,全部無引用Source,真偽難辨,大學生Term Paper都比佢嚴謹。

2. 邏輯錯亂:我想問乜嘢叫「⋯不應准許嚴重危害法治的重犯參與選出立法人員,以維持立法機關持正不阿。」?(文件2.12節,第10頁),然後整兩個純粹以量刑計算的方案出來(方案二:2.13-2.15,方案三:2.16-2.20」),公民權利就係公民權利,原來犯咗罪就可以無咗最重要的政治權利,呢啲乜道理嚟?共產黨?

3. 根據文件2.07節,德國法院可以基於叛國、選舉詐騙及恐嚇選民,判喪失投票資格。而《立法會條例》53(5)(c)條,禁止干犯與選舉或賄賂有關罪行人士,定罪後三年內喪失投票資格,未被法院裁定違憲,而且53(5)(c)描述罪行,都是危害他人公民權利的罪行,保留53(5)(c)條限制就夠晒,唔駛咁多廢話,呢個係合符歐盟主流要求(唔計比利時)。

4. 唔應講講咗,但應講就唔講,如果有人入獄,果條友同時係功能組別選民,果個人的專業資格因判罪被剝奪,咁條友有無權在獄中,就佢之前個專業界別投票呢?呢個問題極度重要,因為小圈子選舉一票可以決定勝負,但以林瑞麟的垃圾程度,當中提都唔提。

5. 反而真係要驚係囚犯會否在獄中被脅迫投票,以及投票點樣監督的問題。依家西方國家的安排,都係防君子,但香港政府咁的質素,在囚人士投票隨時出現被脅迫投票等一堆人身安全問題。所以候選人親身探望我認為係必要,反而應該賦予點票監察人以及選管會官員,在選舉期間享有類似太平紳士的突擊出入監倉權力,以及接受與選舉有關申訴。當然呢項權力唔可以被濫用來拉票之類。

6. 但涉及好多好仔細行政安排,又涉及公民權利同執行法院判令,但呢廿四頁紙文件兒戲程度,係大學論文都不如,我心諗香港市民用咁多錢請林瑞麟嚟做乜?混吉?

我唔建議大家拎hard copy嚟睇,環保啲(最環保係送林瑞麟去堆填區,免得佢浪費地球資源)。但如果你想睇呢份垃圾文件,呢度有soft copy。
有關在囚人士投票權的諮詢文件

後話:政制及內地事務局班廢人,唔該唔好當Hindi就係印度語,印度有好多個語文
印地語的新聞公報
依家政府話係Hindi,Hindi係印地語,印度其中一種官方語文,而部分印巴裔人士除咗英文,係講淡米爾語(Tamil Language),新加坡代表印度裔人的官方語言就係淡米爾。如果政府係有心出新聞公報俾印巴裔人士,唔該除咗照顧巴基斯坦+印度中北部的印地語,亦請出埋照顧南部和南洋印度裔人用開的淡米爾語。俾識中文的印度人睇到,實笑壞人個口。

2 thoughts on “垃圾部門,垃圾文件

  1. 咁垃圾的文件,直頭有辱香港人。

    現在香港政府係食野唔做野,做野打爛野。連大陸都知道資本主義社會應有甚麼制度化建設和法規建置,都知道要與時並進。偏偏香港呢班官示範開倒車撞甩尾。

    攞來填海都嫌佢又臭又有毒。

  2. 其實我諗唔明畀重犯投票,會傷害立法機關。
    全香港重犯有幾多個﹖佔幾大比重﹖

    倒是功能組別方面,如果他是因為專業失當而入獄,那麼我同意應該暫停他在功能組別的投票權。

    囚犯並不算多,在獄中投票可能會讓人知道投票意向。如果順便發展郵遞投票,利及一般市民,也是好事。

發表迴響

你的電子郵件位址並不會被公開。 必要欄位標記為 *