第四代.藍海理論.間接路線

第四代好多時唔知出路喺邊度,但除咗鬧爆第二代人唔俾位我地上,我地仲可以做乜?

我嘅答案係間接路線(indirect approach),人生規劃上嘅間接路線,可以用藍海理論嚟講。

依家啲家長好得意,好鍾意一窩蜂向同一條路進發,例如入名校,當你見咁多人爭果條咁窄嘅路,咁嘅殺戮戰場紅海你爭嚟做乜,你付出幾倍氣力隨時得番個桔,喺戰略上,似係災難多一啲。

你應該搵啲無乜人行過嘅路嚟行,好似我咁,小學人人爭筲箕灣官中嚟讀,我偏偏走去讀中文中學嘅金文泰。當人人補習搵外快,我就寫政治評論搵外快。人人爭住讀工管,我走去讀政政,呢啲路睇落唔直接,但事實上當你慳咗好多力氣時,你嘅進度會比人快嘅,一如曼斯坦嘅德軍經阿登山區進軍法國一樣,睇落崎嶇,但由於法軍唔發覺呢條路係坦克行得,結果曼斯坦軍團行得遠遠快過同你馬其諾防線正面衝突。

基本上,我識嘅朋友,好多查實係靠藍海或間接路線去上位,除咗我本人,以及林忌,我前女友,我識好多文化界朋友,都係咁。

好似黃明樂,好多香港人會認為她有政務官點解唔做,但我睇法係,如果她有向從政呢條路,她由幫泛民打選戰,做自由人,做文化人,再日後經民選呢條路,再嚟個回馬槍,同她同屆嘅,邊個會快啲做局長或副局長,我相信識間接路線嘅人,應該知道我推斷嘅答案。

第四代人,無必要再被第二代人嘅直接路線框死自己,發揮你嘅戰略頭腦,你搵你嘅未來,呢個係我二零零八年嘅忠告。

6 thoughts on “第四代.藍海理論.間接路線

  1. 讀名校嘅得益係對手强(包括對手背後的支援强)、人脈廣、壓迫感貼身,係打做菁英之必要之惡;當然這些優點也就是缺點,許多细路會頂唔順。知足的家長會隨意,不知足的會强求;好幻想的就只知要「不吃草的馬兒」(如果冇就罵政府,代議士又乘機抽吓水),佢地只要劉翔奪獎的一煞那光輝,而不要那長年累月的艱苦訓練。至於出來做嘢,名校生初期一定有d著數,所謂先天足,多榮少辱。後期發展,當然要八仙過海了。今日中大算係簿有名聲,呢d係師生多年來的努力。如果喺三十年前,你就會嘗到不是天子門生的滋味矣。

  2. Leona: 謝謝妳讚賞先

    mum: 我家三兄弟都是名校畢業,但現時家長爭名校的心態和手法都太變態。

發表迴響

你的電子郵件位址並不會被公開。 必要欄位標記為 *