香港文學-min

香港文學 唔應該只限一直左膠所講果啲

馬建嚟香港,好坦率話佢討論所謂普通話,認為佢家鄉講嘅青島話,以及廣東話好靚,呢個係摑咗唔少以為華語至係靚嘅友仔一巴掌。星期日可以寫啲趕客啲議題,其實我都忍咗好耐, 香港文學 唔應該係左膠限定果啲至係 香港文學 ,有兩個範疇係明顯忽略,需要我們一代人去補足。

香港語同英語 香港文學

首先,喺抗衡華語霸權嘅前提下,用香港語書寫係必須,呢個亦係我呢度多年以嚟堅持用香港語嘅原因,唔知講所謂 香港文學 嘅人,有無提到香港語文學呢個問題,呢種語言嘅作品,有高手喺度寫,好似史兄,或者Pizza,但需要更多人用香港語寫嘢,我唔排斥華語,但香港語作品係必須有更多,寫得嘅語文,至可以挑戰華語吓吓都話華語至寫得嚟大人嘅情況。我都可以流利咁用華語寫文,甚至我講華語都係流利添,但呢個世界,有啲嘢係有所為,有所不為。所以香港文學界,係點睇用香港語寫嘢嘅人,我相信有部分人都唔介意雙語去寫,但如果有人認為華語高人一等,呢挺人係港奸無誤。

跟住,香港有唔少人,係只能用英文寫嘢,呢個係歷史使然,而香港一定會有相當數目使用英語嘅人口,咁 香港文學 又照唔照顧講英文一群,唔好將視野限於白種人,香港好多印裔、巴基斯坦裔、南洋血統,以及尼泊爾人,甚至菲律賓裔人,印尼裔人,佢哋嘅英文寫作,甚至印尼文寫作,又係唔係 香港文學 同樣照顧嘅範圍。印裔嘅英文寫作,應該喺香港佔一個重要席位,而香港人亦應該知道佢哋嘅故事。而我相信,印裔香港人一樣可以出到好手,英國文學移民三雄中,一個日本裔(石黑一雄),兩個印度裔,一個係 Sir Salman Rushdie(伊朗果班神棍追殺緊佢,我對伊朗神權政權班友一律稱作神棍),另一個係Sir V. S. Naipaul,都係印度裔。香港印度裔,點可能忽略佢哋喺 香港文學 嘅潛力。

香港文學 可以有陳慧、可以有金庸、可以有倪匡,可以有劉以鬯、但可以有更多可能性,香港本土運動需要紮根本土,擴闊香港唔同種族嘅視野,呢個至係令 香港文學 真正可以茁壯成長之路,而唔駛吓吓靠政府資助。

發表迴響

你的電子郵件位址並不會被公開。 必要欄位標記為 *