Dinner for One

德國膠談 : Dinner for one

雖然大家心目中德國唔係一個膠國,但德國有啲嘢可以好膠,係膠到成為國家標誌都引以自豪,而德國郵政喺2018年10月11日,居然為 Dinner for One 出郵票,呢種膠已經去到我都唔識講嘅地步,我只能講,德國人嘅自嘲唔會比英國人弱。

Dinner for One 郵票後面嘅德國膠傳統

Dinner for One 呢張郵票,你話主題黐線都係㗎, Dinner for One 係德國公共廣播聯盟(ARD)同ZDF除夕一定播嘅黑白英文殘片,由1963年首播,1972年至今無停過喺除夕播,情節係英國貴族Sophie喺佢九十大壽果日,即係佢生日果日請佢啲朋友食飯,但佢啲朋友都死過鬼晒,所以佢嘅老隨從扮晒佢啲死咗嘅朋友食飯。無錯,劇情好膠,但呢個係德國文化嚟,因為德國人係希望世事一切如舊,你睇德國啲建築就知,德國有啲新樓,起果個樣同佢以前果座樓係一樣嘅,所以德國人認為除夕應該喺 Dinner for One 中開始,都係個主題,年年如是,一切依舊。我諗1997年果刻嘅香港人,都會有呢個諗法,如果一切喺1997年6月30日前嘅世界就好。

至於 Deutsche Post 居然夠膽為一個德國膠傳統出郵票,呢樣嘢都好德國,點解我咁講,今日嘅 Deutsche Post係由 Deutsche Bundespost (聯邦德國) 同 Deutsche Post (DDR) 合併而成,雖然總部同個logo 跟 Bundespost ,但企業主色同個名卻係少數保留 DDR 年代色彩嘅主要政府相關企業。而熟集郵史都知, Deutsche Post (DDR)出名係乜,就係出郵票嘅商業觸覺極強,因為當時東德最大嘅hard cash來源正係 Deutsche Post (DDR) 啲郵票,某程度上,今日嘅 Deutsche Post 出郵票,講設計美感及唔上法國 La Poste ,但商業觸覺仍然好強,至少出膠郵票呢家嘢,我估無第二個郵政機構咁做。

德國本來就可以好膠,成個歐洲都係好膠。

後話:如果 Royal Mail 出 Mr.Bean 郵票,以 Mr. Bean 寄信寄出膠果集做主題,一定有人買,雖然馬爾代夫出過,但要有女皇頭至有意思。

發表迴響

你的電子郵件位址並不會被公開。 必要欄位標記為 *