國際刑警-min-孟宏偉

孟宏偉 被拉件事越嚟越黑

國際刑警前主席 孟宏偉 人間蒸發事件,真係越嚟越黑,黑到可以攞嚟拍荷里活電影嘅程度,因為郭文貴自己指, 孟宏偉 可能爆海航創辦人王健之死內幕,跟住,又有海外傳媒指, 孟宏偉 老婆根本同郭文貴好熟,成件事十分之震撼,究竟依家搞乜鬼。

孟宏偉 同郭文貴應該暗中聯盟

好多人以為郭文貴吹水,但依家郭文貴係同班農玩埋一齊,大家都知班農係特朗普以前個軍師,所以呢條友並無大家想像中純粹吹水咁簡單,呢條友係有佢嘅算盤喺度。而 孟宏偉 以及同佢老婆嘅通訊方式, 孟宏偉 一早知佢返中國會出事,所以 孟宏偉 係一早鋪路條線,總之佢有乜事,佢老婆可以點回應,甚至一早做好同郭文貴嘅溝通,有事就由郭文貴引爆,反正大家有共同敵人,呢個正係中共嘅權力邏輯。所以將 孟宏偉 同王健之死拉埋一齊講,好大機會消息來源就是 孟宏偉 自己,而郭文貴打算喺下個月聯同班農大爆王健之死內幕,當中部分資料應該係 孟宏偉 提供,呢啲中國共產黨式講法,就係魚死網破,而香港嘅講法,就係大攬炒。

所以 孟宏偉 被拉件事係十分之黑,而且消息滿天飛,咁玩法,中共權鬥將會越嚟越唔顧底線亂玩一通,如果有香港人被捉上高鐵洗頭快車,我完全唔感到意外,李波同蕭健華都係咁樣拉埋中國之嘛,總之一單膠過一單,簡單嚟講,對於成日講中共政權壞話嘅人,可以住嘅安全地方越嚟越少,一係好似郭文貴咁玩,有咁盡玩咁盡,反正都唔知幾時命都無,一係對完全深潛,盡量避開有華人嘅地方,等到天下太平再諗點出嚟,否則依家只會係亂七八糟。

呢啲都係支爆嘅結果,好多人以為共產黨同依家當權果班會千秋萬世,跟車太貼會死得好慘,特別依家呢個政權我只能用一個青山政權嚟形容,香港仲有班友以為青山係金礦,你真係唔知青山係青山,定係香港係青山,呢啲係飛越瘋人院呢套片都探討唔到嘅硬膠問題。但 孟宏偉 事件唔會就咁算數,一定會越爆越多黐線內幕,甚至可能仲會有人死都唔奇,畢竟呢單嘢涉及嘅錢同權都太過黑。喺呢個神經政權下,你應該做乜,你下一步應該點,我唔駛畫公仔畫出腸。

發表迴響

你的電子郵件位址並不會被公開。 必要欄位標記為 *