著數袋咗入邊個人個袋

呢個世界好過癮,有啲友仔以為政府無所不能。例如政府提供一啲補貼,或提供廉價嘅服務,小市民一定會受惠。但實情係唔係咁?

當然唔係,呢個世界有租值消散(Rent Dissipation)嘅問題。所謂租值消散,簡單啲講,就係當一啲人為干預,令市場均衡價與人為干預之間出現差距,有利可圖時,大家就會用各種方法爭食呢塊餅,可能係有人打茅波,搞黑市,亦可以係政府為咗防止有人打茅波,搞黑市,請咗成棚公務員返嚟,最終呢塊餅,小市民無幾個食到。

張五常喺《經濟解釋》一書係咁寫:「價格管制,因為收入的權利界定不清,會引起租值消散!」

而昨天審計署關於食衛署街市嘅報告,指租金比市值平大一截嘅食環署街市,竟然有檔主沙膽到分租俾人賺錢,無本生利。呢個就係典型嘅租值消散現象,結果市民買嘢係無平到嘅,因為當中嘅著數被班世襲檔主袋晒,同張五常講嘅情況一模一樣!如果班規管膠話要加強監管,食環署開多幾個位,咁果幾位食衛署新請返嚟嘅人袋咗啲著數。

昨天立法會班膠議員,辯論的士嘅問題,但無辯論到一個核心問題,點解的士司機變咗的士奴隸,一日要開廿個鐘車都搵唔到食,就係因為運豬署限制的士牌照,但又被的士牌照轉讓,以及一人擁有多個的士牌,結果造成有班友可以搞到的士車租喺天價水平,結果司機做幾多轉都唔夠俾車租。班規管膠要打擊八折黨,但查實係咪最實在,係咪解決炒賣的士牌搞出嚟嘅租值消散問題?

著數袋咗入邊個人個袋,係分析時事或經濟現象其中一個應該要諗清楚,問清楚嘅問題,唔好人云亦云。

延伸閱讀:
繆美詩:租金的迷思
香港政府審計署第五十一號報告書第六章:公眾街市的管理(全文)
香港政府審計署第五十一號報告書第六章:公眾街市的管理(撮要)
張五常:經濟解釋卷三:制度的選擇

3 thoughts on “著數袋咗入邊個人個袋

  1. 個重點唔在於分租,而是政府收平租唔等於商鋪會平賣。檔主會食左個差價,呢點o係《誰賺了你的咖啡錢》也提及過。

    但如果完全按照市值租金,當樓價大升之時,可能有好多小商戶被迫結業,只讓連鎖店得益。雖然咁樣係「效率」最高既。
    所以政府唔似領匯大幅加租,亦非沒有好處,至少可以保持小商戶有經營環境。
    但究竟租金要幾多先算合理,就好難講。

  2. 我的答案是,關鍵不是租金幾多先算合理,而是明知有租值消散,這筆租值「散」給誰。

    如果食環署的街市,很便宜的租,租給一些殘疾人士,明知他們會「分租」都不要緊,但租了街市的,就不可以再接受傷殘津貼,這又如何?

    明知政客不會贊成廢除食環署街市,或將食環署街市售予領匯,明知加租政治不正確,明知這些理由,最務實的方案便是這個。

    此外,要幫領匯講句公道話,在街市搞到大幅加租的膠情況,不是領匯搞出來,而是領匯上市的程序太粗疏,沒有將房署外判出的街市收回,才交給領匯。結果外判商亂加租,但公關惡果要領匯受。

  3. 講起領匯,現在的加租情況並不是局限於街市,而是整個領匯產業,當中包括肥肉領匯商場,真係加幅極高。
    真係過多一年半載領匯商場有連加佛同H&M都似,只有這些超級租戶先有能力租呢d盤。

發表迴響

你的電子郵件位址並不會被公開。 必要欄位標記為 *