何志平-2

由 何志平 下場睇香港搞國際關係嘅人

何志平 作為一個眼科名醫,做到變香港局長,最後竟然幫中國做war lord做到好可能喺美國嘅監獄終老,真係拍成荷里活電影都有佢價值。其實呢件事,係對好多香港人,諗住幫中國做國際關係白手套搵銀嘅人嘅警告。只不過,好多香港人,為咗搵食,繼續做中國嘅白手套,如果一旦出咗乜事,被人拉埋,真係唔好怨。

何志平 並唔會係美國最後一個想對付嘅人

何志平 好明顯係美國收網對付嘅第一個人,只不過,唔會係最後一個,除咗董建華之外,你估美國、英國無掌握你班友平日出入邊度㗎,特別係當中有人揸緊英國護照,其實要掌握呢啲出入境數據並唔難,然後平日講果啲國際關係觀,好多時都係中國中心,中國為本觀點,呢啲其實西方國家都知,只不過,以前西方國家,亦樂於利用呢啲人,作為同中國嘅溝通橋樑,畢竟過往唔係戰時狀態,甚至想喺經貿上得到若干好處。但依家已經十分接近戰時狀態,而呢啲人喺一帶一路中扮演一定角色,所以你覺得美國人唔會做嘢,我覺得無乜可能,只不過睇幾時收網。

其實依家係一個抉擇嘅年頭,喺大戰前,你食兩家茶禮,左右逢源無問題,甚至戰時,都會保留少量可靠嘅人,作為橋樑,特別相信依家未去到World War 3嘅時候,如果係新冷戰,或者大支爆,係仍然會有極少數嘅人,喺雙方要求下進行資訊交換,只不過,都只會係喺政治信仰上好可靠果啲,同埋做呢啲嘢嘅人數會十分之少,以及佢哋嘅角色,好可能只不過係一個「郵政信箱」,除咗互通信息,無其他嘢可以做㗎喇。

香港人其實唔啱玩國際政治,國際關係,因為國際政治唔係純粹生意上做deal,其實國際關係嘅本質,就係安全問題,國防問題,總體資源問題,意識形態問題,所以唔可以做兩頭蛇,做兩頭蛇只會死得十分慘烈,霍英東喺1950-55年可以做嘅事,美國默許英國做嘅事,依家霍英東復活都唔可以做,因為理由十分之簡單,就係時代轉咗,仲要中國大部分時間都唔係美國嘅首要敵人,但依家中國變成西方民主嘅首要敵人之一,呢個係香港人完全無準備。

發表迴響

你的電子郵件位址並不會被公開。 必要欄位標記為 *