Financial Times-min

Financial Times 記者被逐事件:屈穎妍呢類文革造反派餘黨累死香港

Financial Times Asia Editor Victor Mallot 喺香港工作簽證被拒,港府只係俾佢七日返嚟香港,呢種做法招嚟 Financial Times 社評炮轟,呢個已經係極危險訊號,因為呢個會打擊好多金融機構喺香港嘅信心,嫌個市跌得唔夠甘。但屈穎妍似乎認為香港死得唔夠慘,竟然話無捉 Victor Mallot 去槍斃係好彩。呢啲簡直係文革極左派造反派回潮嘅凶兆,香港人最好自己保重。

Financial Times 編輯都想槍斃嘅思維

屈穎妍係土共後人,佢一直想為1967年暴動翻案,1967年暴動嘅本質,就係中共文革極左派不顧一切四處鬧事。如果唔係1984年中英簽署協議後,中共無人,又遇上1989年民主運動,中共可以用嘅司徒華同李柱銘都決定同中共一刀兩斷,剩番啲投機分子,以及文革極左派垃圾,我相信屈穎妍呢啲人未必翻到身,文革極左派,造反派好多喺八十年代係被整肅嘅對象嚟,近年有啲紅衛兵可以去西方國家大跳大媽舞,已經係習近平掌權,紅衛兵主導中國政治之後嘅事,喺鄧小平年代到江澤民年代,做中共極左派係無運行。所以,香港土共係中國共產黨內嘅異數。

但受制於《中英聯合聲明》呢個國際協議,佢地一直都唔服氣點解中國接管香港咁耐,土共仍然未能夠掌權,1967年嘅暴動未能平反。當然,中共本來對土共都係長期利用,你估真係想佢地掌權,係都俾中共啲紅二代之類,所以俾楊光大紫荊,但又唔正式平反1967年暴動,只不過,時移勢易,中共依家出現毛派當權,呢班土共仲唔乘機有咁盡講咁盡,掌埋權仲好,所以屈穎妍入梁振英陣營,佢哋同其他專業人士背景出身果啲唔同,我星期日休息寫過,專業人士入梁營目的係為權為利為名為勢,但屈穎妍呢種人目的好簡單,香港文革化,香港死定活,關條友鬼事,根本係心理變態,而《大公報》刊登屈小姐嘅文,反映出依家香港土共渴望奪權嘅心態,佢哋為奪權可以去到幾盡,我都唔知,但如果香港繼續俾呢班友掌權,就一定無運行。

發表迴響

你的電子郵件位址並不會被公開。 必要欄位標記為 *