李鵬飛-min

李鵬飛 嘅勸告:邊個聽得入耳?

李鵬飛 已經完全退出政壇,佢畢竟都七十八歲,佢接受蘋果日報訪問果陣,勸所謂建制派,要企喺香港人果邊,當然,以依家自由黨人嘅智慧,好大機會被人當耳邊風。 李鵬飛 係香港罕有有政治智慧嘅商人,但香港其他人商界中人,喺政治上真係太蠢。

李鵬飛 睇清楚成個形勢

李鵬飛 係英國人精挑萬選嘅人,如果佢唔識政治,相信佢唔會獲英國政府重用,亦唔會堅持自由黨必須走直選路線。但 李鵬飛 可以做到呢點,因為 李鵬飛 係真老闆,唔係果啲用打工心態搞政治嘅仆街,所以佢好清楚香港必須大形勢上保持原有地位,否則做生意嘅會死,亦唔會對中國有所益處。但香港好多人做生意,都係用做打工仔心態去做,總之要令中國開心,中國俾啲唔駛用腦嘅錢你駛,所以呢啲友仔視野狹窄,亦唔會顧香港嘅前途,個個都只係睇眼前嘅有限利益,香港商界嘅集體崩潰,其實亦都係依家香港做生意,好多都係想做啲唔駛用腦,唔駛開拓國際市場嘅生意。稍為有頭腦果個,就係李嘉誠,但大家都知,李嘉誠已經走咗,並且轉型做歐洲商人,我相信李嘉誠喺歐洲嘅網絡,其實未來會對香港有所益處,但李嘉誠,就真係只此一家,別無分店。

所以 李鵬飛 點苦口婆心都好,香港商界集體玩完局面唔會大變,香港商界好大機會要等中國大亂完,經濟大崩潰後,喺困難中起嚟嘅一代重新嚟過,或者一早走咗去外國果啲人,佢地將外國嘅做法同視野重新帶返嚟香港,先至可能有得救。俾我係飛哥會唔會安心退休,我諗日日睇番啲咁嘅新聞,俾著你都唔敢安心退休,因為依家根本係一個史無前例嘅大亂局,而且亂嘅程度去到一個匪夷所思嘅水平。

同埋一樣嘢,香港商界一般無修政治呢一課,同南洋人搞生意,多少有政治能力好唔同,你睇郭鶴年同香港其他商人係唔同嘅level,政治經濟本為一家,但過去咁多年,香港商界唔係政治白痴,就係討厭政治,所以同佢地講嘢好多時係對牛彈琴。香港人太多只係讀書果陣只係讀Business Administration,亦即係最廢嘅一科,如果要喺商界生存,其實讀文、讀社科好過讀商。從商有如營運一個小王國,唔識政治真係等死。

發表迴響

你的電子郵件位址並不會被公開。 必要欄位標記為 *