國際刑警-min-孟宏偉

中國扣留 孟宏偉 手段實在太爛

國際刑警組織主席 孟宏偉 人間蒸發事件,玩到法國警察要去查,最後中國政府喺國際壓力下,指 孟宏偉 被中紀委立案調查,仲要隨即出現 孟宏偉 嘅email話辭去組織主席職務。中國呢鋪,真係玩得太爛,玩到挑戰全地球,我覺得依家聯合國將中國趕出去都好合理。

要拉 孟宏偉 唔該做得靚少少

你話 孟宏偉 係唔係好人,周永康委派嘅人都唔係食齋嘅,我講法係真係正宗鬼打鬼,黑吃黑,問題係, 孟宏偉 始終係國際刑警組織嘅主席,呢個組織始終係國際組織,你中共點執法家法都好,唔該叫 孟宏偉 辭去Interpol職務至好拉人,你依家係乜,當全世界基本秩序無到,基本外交規則無到,不單日後唔會再有國際組織選中國人做主席,而且好大機會出現新嘅世界秩序,即係二次大戰後嘅聯合國結構都唔要,或者大為弱化,改為要一個新嘅國際架構出嚟,一如二次大戰後,阿水都知國際聯盟係廢嘅,就直頭將國際聯盟解散,由二次大戰五個戰勝國為基礎嘅聯合國取代,而原有一啲國際聯盟下嘅組織,由聯合國吸收。我相信,中國搞到國際秩序爛到呢個程度,都將會某程度上導致聯合國、世貿呢啲組織被弱化,由新嘅組織所取代。

英國人幾唔妥歐盟都好,歐盟有樣嘢係好,就係歐盟入會係要符合一系列要求,包括民主人權司法等等,果啲唔夠料嘅國家,磨爛蓆都唔會入到,一如土耳其同歐盟傾咗咁多年,仲要半隻腳入咗歐盟嘅Custom Union,都唔可以入歐盟,因為土耳其嘅民主係有問題,依家確實係證明有問題。匈牙利呢啲傳統歐洲國家,佢嘅民主都出事搞到要隨時停權。我覺得未來所謂強國俱樂部,一定要有呢個要求,上世紀俾俄國、中國呢啲國家亂咁舞嘅結果真係太可怕,而中國人依家唔尊重國際秩序嘅程度,簡直係史無前例,所以歐盟式審查,可能係必要嘅,否則呢個世界真係會得個膠字。

孟宏偉 其實都係醒,暗中向佢老婆通信息,我相信 孟宏偉 預咗自己無命,但至少佢老婆同細路喺法國係安全嘅,我會咁講, 孟宏偉 老婆同細路好好做個法國人,同埋明白,跟中共或中國根本係死路一條,只要向西方民主自由價值走至係光明大道。

發表迴響

你的電子郵件位址並不會被公開。 必要欄位標記為 *