蘋果日報

蘋果日報 唔係乜嘢廣告都可以接嘛

我一直以嚟都有全香港最嚴嘅廣告政策,就係中國廣告一律ban,搞到我每日浪費成個鐘捉啲垃圾廣告,因為你亂接廣告,會被人質疑你嘅真正立場。 蘋果日報 一直以嚟都唔接土共特約轉載廣告,但呢次我發現佢接咗團結香港基金個廣告,我無法認同 蘋果日報 呢個商業決定。

蘋果日報 無責任幫土共賣廣告

喺台灣,自由時報會出現國民黨廣告,聯合報都會出現民進黨廣告,但呢個係因為雙方都有對等尊重,即係我會接你生意,你亦會接我生意,只不過版位都唔會俾到靚,但香港啲土共報紙,會登泛民嘅廣告咩?所以我一向認為,既然土共都唔會俾支持民主一方公平待遇,點解要接土共啲生意,霸佔版位,幫土共做垃圾信息宣傳,兼且毀壞自己個brand,我唔知呢個決定邊個做,但呢個決定我係極唔認同,賺老董呢啲陰質錢做乜至得,劉德華呢個「民間特首」亦無得到大部分市民認同就係。

所以我寧願辛苦啲賣德國同歐洲嘢返其他國家,搞月費網站都係咁解,當你學其他KOL或網媒靠所謂特約轉載為生,你等於將你自己嘅財路交俾土共掌握,呢個根本係一個好爛嘅安排嚟。依家我賣嘢,至少我可以透過賣嘢宣示我嘅政治立場,例如唔買中國貨,甚至係推廣循環再造,好似Kaffeeform啲杯,賺錢係應該嘅,但唔係乜錢都賺得,仲要依家 蘋果日報 嘅做法,會損害作為香港民主派大報嘅信心,你覺得你自己好多讀者,雖然香港好多抄報都已經死晒,根本係Monetization唔到,但 蘋果日報 真係要自殺到呢個水平嗎?呢件事同教宗同中國簽果份協議爛嘅程度,真係有得揮。

當然,民主派支持者,亦唔可以只係依賴單一傳媒,我諗我個人比較好彩係,我可以將稿交俾香港以外傳媒發表,亦有能力自己管理網站,真係唔駛等一兩個大孖沙然後坐以待斃,相信依家民主派要留意一樣嘢, 蘋果日報 有啲人係人鬼難分,只不過依家無證據,依家有證據咁解,支持泛民傳媒嘅多樣化係至為重要,當然,多樣化嘅支持,唔可以流入立場新聞呢啲垃圾度喇,掛羊頭賣狗肉嘅人真係太多。

後話:我講明特約轉載政策,我係唔收土共嘅特約轉載,商業機構或NGO嘅特約轉載有得傾,但唔可以違反呢度基本立場,所以我亦唔會太花時間爭呢啲生意。

發表迴響

你的電子郵件位址並不會被公開。 必要欄位標記為 *