梁振英-黨員-min

梁振英 係做唔到中共政治局常委

有人向蘋果放風,指 梁振英 想更上一層樓擔任中共政治局常委,我聽到呢個消息,我覺得蘋果日報老總批呢篇稿出街之前,有無問過真係熟中共黨史嘅人,除非 梁振英 直認係中共黨員,而且佢長期生活喺資本主義城市,根本唔多可能做到。

梁振英 功不如薄一波

你話地下黨可唔可以喺中共攞到實權,實權係有可能攞到,好似薄熙來老豆薄一波,佢曾經喺1936年為咗出獄,喺劉少奇得毛澤東批准下簽字反共退黨,然後加入閻錫山陣營做地下黨,借閻錫出嘅帽嚟做共產黨嘢,連軍事資源都攞埋,做地下黨做到咁出神入化,佢係其中一個,呢個亦係文革六十一人反黨集團事件嘅起源。薄一波喺中共位置好高,文革前做到財政部長,文革後係中央候補委員,但佢始終無做到政治局常委,佢都係中央顧問委員會委員,但呢個已經係元老垂簾聽政,都已經講唔上實際掌權。仲要薄一波喺1943年基本上已經唔係地下黨,因為佢擺明車馬入延安學習,國共內戰佢自己都有份打埋一份,你 梁振英 承認咗自己地下黨身份未?

而且中共政治局常委,基本上除咗國家主席、國務院總理、人大常委會主席、全國政協主席按慣例必定擔任外,第五至第七人,一般都手握中共重要機關或權力位置,例如王滬寧係管中央書記處,而趙樂際係管中紀委,以前人大常委會主席栗戰書係管中共中央辦公室,而韓正管港澳事務外,因為佢係實際上上海首席諸候,你 梁振英 老幾?

仲有一樣嘢,中共1989年後慣例,港澳事務不由港澳人士執掌,一如新疆維吾爾人,佢地喺解放軍作出幾重大貢獻都好,賽福鼎少數做到候補委員兼且係揸槍(有軍權,有軍籍)兼且做埋新疆自治區黨委書記,亦係得賽福鼎一條友咁夠薑,但呢個同佢有多少蘇聯背景有關,免得呢班友個個向蘇聯告狀,中共就好唔得閒。你 梁振英 係乜?你連做張曉明果份,中共都未必會俾你,更何況韓正果份,我真係唔知寫呢條新聞果條友,究竟識唔識中共黨史,呢個係我研究中共黨史咁多年,睇到最荒謬同唔合邏輯嘅新聞。

如果 梁振英 都做到中共政治局常委,都應該準備亡黨亡國,而且如果呢個消息來源係 梁振英 本人嘅話,我相信好快習近平會要求 梁振英 坐洗頭鐵,果然係鐵一般嘅反黨分子。

發表迴響

你的電子郵件位址並不會被公開。 必要欄位標記為 *