遮打革命-min

遮打革命 四週年

遮打革命 ,我一直係以9月28日夏愨道戰役作為分界線,唔係黃之鋒做賭撚入公民廣場果日,當然,黃之鋒做賭撚喺歷史上係重要,但如果真係香港歷史分界線, 遮打革命 真係爆發係夏愨道戰役,好多人都睇唔到,龍和道之戰係一條分水嶺。

遮打革命 仍未結束

點解我話夏愨道催淚彈大混戰至係 遮打革命 嘅開始,因為喺2014年9月28日之前,無人相信香港人真係走去做賭撚,不惜一切同政府對抗,並且佔據馬路,香港人做得出呢樣嘢,好多人係睇唔到果種民氣,當然,夏愨道之戰實際上係好多嘢嘅累積,包括WTO果次,韓農嘅戰術示範(果次一早示範咗,死守告士打道幹線實屬傻佬所為,戰術上最愚蠢嘅做法),以及香港人對警察濫用武力有咗戰術上嘅認識,用工程帽防警棍亂打,告朱經緯呢類柒頭ABH等等,都係過往嘅戰術累積成果,甚至有部分涉及我提出嘅戰法。而呢次,係將香港人同政府,以至中國嘅衝突浮上水面,所以我以呢日為遮打革命嘅開端,因為到依家嚟講,夏愨道之役仍然係有戰略同戰術意義。

只不過,2014年9月28日呢一役,實際上亦係泛民同市民分道揚鑣嘅開始,亦係港中分家之路嘅起點,成個泛民,得一個叫戴耀廷教授嘅戰略家,有心理準備玩鋪勁,你話9月28日凌晨戴教授宣布佔中啟動有騎劫之嫌都好,至少佢係有論述擺喺度去騎劫,一如孫中山都係老笠辛亥革命成果,但孫中山係有套論述擺喺度先,所以世界係留俾有準備嘅人去玩,而成個泛民完全唔知自己做乜,唔識群眾諗乜,亦唔識領導群眾,結果咪俾黃毓民呢條老人渣有機可乘,所謂拆大台,其實有一半係泛民自己愚蠢做成,當你見到群眾做賭撚果陣,你應該知時勢已變,但泛民就千古不變,左膠更加唔駛講,呢個係日後分裂嘅導火線,你唔知時勢變而去回應時勢,結果咪俾人拆大台。

但港中分家嘅路亦因此展開,中國嘅政策越嚟越仆街,當獨派想選舉都唔得果陣,唯一走向首先係獨立,暴力行動我唔知幾時出現,但真係出現我諗都會十分之頭痕。港中分家其實係催淚彈炸出嚟嘅裂痕,當然張曉明呢啲讀蘇聯書讀到中毒嘅仆街係唔會明,中共永遠係以為蘇聯保守派果套係啱,但歷史現實係,蘇聯係被班保守派隊冧。

遮打革命 四週年,係一個好嘅機會瞻前顧後,雖然我都唔敢估四年後乜世界,我都估唔到四年後嘅今日我竟然喺德國喇。

發表迴響

你的電子郵件位址並不會被公開。 必要欄位標記為 *