匯豐-加息-2-min

匯豐 加息 開始加速支爆

匯豐最終都係要加最優惠利率,其實呢次 加息 幅度已經十分溫和,八分之一厘,表面上好似無乜嘢,但匯豐開始 加息 ,不單有心理作用,而且有部分已經好脆弱嘅投機者同企業,好大機會走數,只不過依家係死得慢一啲咁解。

加息 終於開始

匯豐定呢個 加息 幅度,當然唔係要追番港美息差,因為如果真係追息差,恐怕至少要加息半厘先得,依家係連0.25厘都唔敢加,因為如果加得太勁,就會好快造成大量嘅Default,依家唔係加按揭利率上限,而係加最優惠利率,好多用緊浮息嘅借貸,好似樓按、的士、小巴等等,都會立即加repayment,每一千萬嘅借貸,就算還款期30年,都要每個月要還多一千銀,大家諗吓的士、小巴呢啲,仲唔出事?依家0.125厘都可能出事,0.25厘就一早爆咗,匯豐依家已經極為小心翼翼,免得十月都立即大爆發,至少仲有少少時間俾人沽售資產,或者進行資產重組,至少唔會因為流動性不足,立即就default玩完。

只不過,應該唔捱得好耐,首先,美國仍然會加息,加多0.125厘,或加息加得好快,所以始終都會屍橫遍野,我講句難聽啲,就係你明天先死,但仲都係會死。匯豐未必即刻死,因為我相信匯豐會同債仔傾偈,恆生會大鑊好多,因為香港嘅債仔,仲會同你銀行傾偈搞有秩序還款,中國果啲就係睬你都傻,實會快速惡性資產轉移,仲會向西方國家走,所以匯豐 加息 會加速支爆過程就係呢個原因,本來香港相對低息,好多中國人嚟借錢順便走埋錢出去,否則唔會有乜內保外貸,依家呢啲內保外貸資產,隨時變成香港銀行界嘅噩夢,匯豐都尚且如此投鼠忌器,就更加唔好講做得大量呢啲借貸生意嘅中國國有行,如果你有錢喺中國國有行嘅話,我嘅忠實建議就係三十六著走為上著,依家唔走就真係堅走得摩無鼻哥,因為果啲內保外貸資產一定爆鑊甘,我真係十分之懷疑香港存款保障制度嘅實質承受能力。

其實一早都應該會睇到呢個局面,未來幾個月,應該係十分之難睇,等到明年農曆新年,我都唔知香港銀行系統係乜世界。

發表迴響

你的電子郵件位址並不會被公開。 必要欄位標記為 *