民航處-雷達站-min

山竹 搞出一鑊泡仲有幾多香港人唔知

香港人好多人熱衷搵銀,討厭政治,但你討厭政治,隨時都會影響搵銀。對於一個電子商貿嘅商人,日日睇住Aftership跟啲貨到咗未,然後耐咗就自己向德國郵政投訴係基本。只不過,香港郵政唔同大家講 山竹 對香港入口郵件造成延誤真係好可怕。

山竹 搞到貨件遲大到一句都無出聲

本來用德國郵政加香港郵政呢個組合,如果唔係保證可以深入每一區,我真係怕有鑊氣,因為香港郵政啲鑊氣係越嚟越重,但 山竹 吹襲之後,我就見到去香港貨件異常咁唔郁,係去到9月26日至開始有復活跡象,我相信 山竹 造成嘅航班取消,以及郵件積壓,係搞到香港郵政一頭都係煙,只不過,香港郵政一直都唔講,係直至到我去德國郵政嘈,德國郵政又去香港郵政嘈(因為有事係德國郵政承擔賠償責任,唔係香港,我寄掛號亦有基本保險嘅考慮),香港郵政至答話因為 山竹 ,交通未恢復正常,所以郵政服務會慢咗,我聽完郵局嘅答覆後,我真係當場被香港郵政激到吐血,果然成個政府乜嘢部門,都可以唔講 山竹 搞出幾大個大頭佛,大佬,商界係有責任保證貨件到個客手上㗎,所以我決定寫篇文出嚟,一方面叫係客戶服務,另一方面,我都要講我依家係對住乜嘢嘔血到爆嘅機構,所以我更堅定加速同DHL eCommerce談判都係咁解,如果可以嘅話,最好都係DHL啲人自己派,至少有相當嘅問責程度。

相反,澳門郵政仲有通知德國郵政, 山竹 重創可以造成若干延誤,呢方面透明度,點解依家香港仲可以輸俾澳門,呢方面,真係十分之匪夷所思。喺德國郵政俾商業客戶嘅GlobalMail Observer裡面,香港郵政係無提過 山竹 搞到一鑊泡,然後會造成阻滯,呢樣嘢咁都得,我堅係覺得不可思議,所以我作為一個經常要寄嘢返香港嘅人,我真係希望香港郵政應該同公眾解釋吓,究竟郵政系統受 山竹 幾大影響,當然我相信啲backlog依家係追得番嘅,應該呢幾日郵差會好忙派件,但乜都唔講果種態度,我真係真心所有保留,香港唔變番正常國家,真係買果個同賣果個都分分鐘被佢激到吐血。

2 thoughts on “山竹 搞出一鑊泡仲有幾多香港人唔知

  1. 其實郵局喺17號出咗新聞稿,話跟住幾日的派遞服務都會有延誤。不過咁多年,就算係加郵費同郵費結構改革都最多喺收音機做宣傳,呢點認真,有問題。

發表迴響

你的電子郵件位址並不會被公開。 必要欄位標記為 *