民坊-基滙資本-min

由領匯到 民坊 :搞生意就係搞政治

領匯本來已經係公關風暴嘅核心,而領匯將啲公屋商場賣出去後,簡直搞到一頭煙,只不過,領匯賣出咁多商場裡面,唯一比較好評係基滙資本旗下嘅 民坊 ,而基滙資本可以諗到由公屋出身嘅人管番商場,本身已經有政治手段多於商業手段,而 民坊 有呢個頭腦,由泰國華人資本有關。南洋商人喺政治觸覺上,係比香港人強一啲,如果有呢種政治觸覺,根本無咁多公關災難。

民坊 後面南洋華人血嘅學費

今日仲有命喺度嘅南洋華人商人及後代,多少都有政治頭腦,並唔係佢地熱衷搞政治,如果有得揀,佢地都唔會從政,新加坡部長人工係世界一等高,因為新加坡大部分大少性格嘅人,正常都唔會出嚟從政,做MP都怕,唔好話做部長或總理。佢地有政治頭腦,因為喺面對南洋果種種族政治過程中,佢地明白錢唔可以賺盡,亦唔可以對基層欺人太甚,否則招來反撲根本無人可憐你,南洋商人或者手段圓滑,但對政治係有一定判斷力,因為唔識政治,真係命都無,或者見過政治上信錯嘢,而身邊人死嘅都唔少,你可曾諗過郭鶴年二哥郭鶴齡係馬共成員,兼且喺馬來西亞緊急狀態年代被殺嘅事(呢個亦係中共對郭鶴年要多少俾面嘅原因,中共爭落南洋華人嘅政治欠債,係欠幾世都找唔掂數,仲要呢班友仲有影響力,所以唯有明知政見唔啱都要合作)。

所以香港商界要少啲公關災難,其實唔係喺表面嘅Spin Doctor技巧啲打花拳綉腿,講嚟講去,就係要有乜都唔賺盡,一切留一線嘅政治判斷力,唔只要賺錢,仲要賺人心同安全,你無命嘅話,啲錢都係唔到你落袋,李嘉誠係政治走位技巧上最高,只不過,佢家族一旦香港有事都唔會攞到凝聚力,因為就係欠咗南洋商人果種低調,同埋賺取人心嘅招數。好似郭鶴年應該就算支爆都唔駛怕,因為佢老人家喺馬來西亞變天裡面,準確作出判斷,同納吉斷纜,企喺人民果邊,所以馬哈迪醫生請佢老人家擔任內閣資政,共同改革大馬政治,問題係,香港商人有邊個有呢種決斷力,喺關鍵時間會企喺人民嘅一邊。香港商界其實係要有遠見嘅政治顧問,只不過,香港商界果種短視,睇嚟要受過血嘅洗禮,佢地至知死字點寫。

2 thoughts on “由領匯到 民坊 :搞生意就係搞政治

發表迴響

你的電子郵件位址並不會被公開。 必要欄位標記為 *