蛋糕-min-移民

歐洲點解少人出去食 (1):由 蛋糕 講起

我唔係煮嘢專家,有時煮唐餐我都係一鑊泡收場,只不過,喺德國生活咗一年,由最初好多時出去食,去到依家,係 蛋糕 呢樣香港成日自己出去買嘅食品,都係自己搞掂埋。因為歐洲好多嘢,根本好多人係自己搞掂,餐廳除非做得好精緻,否則你好難自己整嘢食啲朋友鬥。

預製 蛋糕 好多時好食過出面買

首先,歐洲家家戶戶都有焗爐,好多唐人喺歐洲最初唔適應好大原因係,因為佢地唔慣用焗爐整嘢食,焗爐係你嘅好朋友,因為好多嘢食都係要靠焗爐搞掂,唔係靠電熱板搞掂,唔同香港,香港唔一定有焗爐,雖然我都咁講,如果你屋企有焗爐,你習慣用佢,對你日後一旦要移民西方國家生活適應係大有幫助,因為焗爐你幾乎可以肯定整到好多熱辣辣嘅食物。

跟住講 蛋糕 ,你話歐洲 蛋糕 貴唔貴,2.5 至 3.5 歐羅一件,查實話貴唔貴,如果同香港買 蛋糕 價錢比。香港Starbucks果啲昆水美心蛋糕,都係呢個價錢,而且無歐洲一般餅店做得好食。問題係,成個歐洲有以下呢種嘢,佢基本上係無敵,佢令你喺屋企可以等一個鐘就有新鮮 蛋糕 食

蛋糕-Oetker
蛋糕-Oetker

無錯, Dr. Oetker 嘅 蛋糕 粉系列,每盒可以整八件 蛋糕 左右,但都係2.9歐羅。

基本上,你買一個焗 蛋糕 用嘅盤,你買咗粉,按指示撈鮮雞蛋同鮮忌廉入去,搞呀搞,再倒入個盤度,個盤要鋪牛油紙,將焗爐預熱160度,然後焗九個字,搞掂,食得。我就係咁樣,成功整咗一盤蛋味濃郁嘅 蛋糕 出嚟,而且鬆軟度啱啱好,又唔係好麻煩,因為你焗 蛋糕 期間,你查實唔駛點理個焗爐,你由得佢就有得食就係。而且德國蛋糕盤,基本上係家家戶戶嘅基本配備,你買一個實無蝕底,你慣咗自己焗 蛋糕 後,除非好難搞果啲款式,否則你唔會考慮喺外面買 蛋糕 。

所以喺歐洲,一係唔好出去食,一係會好貴,因為快餐店喺歐洲無乜市場,而外面啲餐廳做得太差,亦好難生存,因為好多人都多少具備整嘢食嘅能力,不論男女。所以如果想喺歐洲開餐館,一係做車站盒仔飯快餐,一係就做得好現代同精緻,否則唐人街大混戰,生存機會等於零,無唐人街嘅地方更加唔駛講。喺我住嘅城市,最能生存到亞洲嘢係日本、台灣同韓國,大家諗吓點解喇。

下一次呢個深宵肚餓系列,我會講自家焗鹹豬手呢家嘢,呢樣嘢,真係解釋到好多鹹豬手食肆喺德國出現嘅原因。

發表迴響

你的電子郵件位址並不會被公開。 必要欄位標記為 *