山竹-min

山竹 2.0?有備無患總好過再受重創

依家潭美喺西太平洋遠處增強緊,好大機會變超級颱風,不過係去台灣、日本定直去巴士海峽抵港,就唔同預報機構意見分歧,但只有一個預報機構預測可能係 山竹 2.0甚至更差,就應該有啲嘢依家就要做,唔可能就咁坐以待斃。

山竹 後遺症要逐件做番好

首先,受 山竹 重創嘅地方,應該依家要加快處理,以及做臨時鞏固工程,唔係等到潭美確認要嚟先做,喺各大預報機構有一個話有可能抵港果陣,你要假定可能10月1日抵港,然後做最壞打算,最終唔嚟,唔緊要,但一定嚟咗,工程未做掂, 山竹 留低大堆手尾,再嚟一件潭美,只要同等威力你已經可以仆街,更何況可能係更強,屆時死傷更慘重。依家就要做相關嘅清理同臨時防衛工事,由9月23日起計,只得七日時間,你做得切已經好叻仔,10月1日果個害人國家嘅禍國日,由得佢喇。

如果潭美照英國Met Office超級電腦嘅預測方向嚟,咁要假定會出現同 山竹 一樣後遺症,依家係有時間就放唔放假設立標準程序,包括修改《公眾假期條例》刊憲,或者已經參考1971年嘅緊急公眾假期,整好相關緊急規例嘅文本,只要一有事就可以即刻攞出嚟用,上次我當你班友無經驗,無所謂嘅Standard Operation Procedure,但你依家出過事,大家都討論過應該點做,有法律可援,以前英國管治果陣有人做過,有人用過,係絕對有時間搞一套Standard Operation Procedure出嚟,政策工具箱係一定有唔同嘅Tools去解決問題,一如車裡面一定要有急救箱,以及基本機器維修工具一樣,依家香港政府嘅情況,如果有成個禮拜準備都搞到炒粉,呢個係人禍,唔係天災。天災係有一套標準工具,將對社會面對嘅負面影響,減到去最低最低。

當然,我唔會想潭美嚟,而潭美嚟嘅機會,依家走去評估係言之尚早,因為氣象嘅嘢,可以有好多變數,但只要危機有可能出現,就要有相應嘅回應方案,依家香港政府,係唔應該用BREXITER果套態度去做嘢,預見有事發生就要做咗嘢先。

發表迴響

你的電子郵件位址並不會被公開。 必要欄位標記為 *