Godaddy-min

GoDaddy 再見

喺呢度嘅數碼證書由 GoDaddy 過渡到 Let’s Encrypt後,我呢度嘅九成半服務都會同 GoDaddy 無關,呢間Hosting以及SSL Certificate嘅發出公司,我都忍得佢夠,我覺得都係時候了斷。

GoDaddy 越做越差

GoDaddy 係我呢度最早嘅Hosting公司,喺早期, GoDaddy 係叫唔錯,至少佢係幾易用,但隨住年月嘅增長,佢啲服務越嚟越差,保安漏洞越嚟越多,而價錢就越嚟越貴,咁點解我要用佢,所以用咗一年時間部署擺甩呢間公司,首先係Domain改為向NameCheap買,然後Hosting轉向以Linode同DigitalOcean嘅方案為主,跟住喺Let’s encrypt嘅數碼證書都表現良好後,就直頭唔再俾錢買GoDaddy啲數碼證書,因為Let’s encrypt都幾乎係業界標準,而且大公司啲數碼證明一樣鑊氣強勁,Symantec啲數碼證書鑊氣之重,大家都知後果係點,咁又何必留戀。

其實有時候,大公司發展到一個規模,反而會越嚟越膠,一如依家我對AWS都越嚟越不滿一樣,S3曾幾何時係業界嘅標準做法,但依家S3都鑊氣唔細,所以我都係向Digitalocean,或其他類近公司走,因為大公司,有時會諗埋啲奇奇怪怪嘢,而且有時為咗照顧所謂大客戶,或者收客收得太濫,反而變咗服務接連出現問題,AWS就係啲中國客戶太多,被中國客戶濫用佢地服務而投訴無門,所以開始要改服務供應商。

當然,你叫我用番香港Hosting公司一定唔制,因為香港啲Hosting公司去到一個又貴又垃圾嘅地步,至少Linode同DigitalOcean嘅性價比係十分之好,而且又唔會受果啲黐線香港法律影響。但你問我用唔用GoDaddy,如果你有一定技術水平,都係唔好用 GoDaddy 呢間公司啲垃圾服務,如果你係現有客戶,係應該慢慢諗計離開,當然唔好急進行事。我每次技術上改進都有部署時間表,停站時間唔好多個半個鐘。良好嘅工程計劃,永遠好過你close咗個站唔知做乜。

發表迴響

你的電子郵件位址並不會被公開。 必要欄位標記為 *