金正恩-棄國-min

金正恩 棄國無懸念

文在寅去平壤,件事越嚟越出人意表,無喇喇簽咗停戰協定,已經睇到全世界呆晒,但更奇嘅事出嚟, 金正恩 請文在寅出席北韓全國運動會開幕式,請文在寅發表演講,並且話要好似韓戰前咁統一。呢句嘢,十分之重要,即係 金正恩 棄國。

金正恩 棄國無棄念

大家明白點解韓戰南韓一方係聯合國軍代表,同埋北韓國旗歷史,就明乜事。韓戰南方由聯合國軍代表,當時蘇聯都唔敢投否決票,一方面蘇聯唔想介入韓戰,另一方面,大韓民國係繼承大韓帝國嘅正統,因為大韓民國係三一運動果度發展出嚟,同東西德原本國家政權散晒完全唔同。所以,北韓嘅法理合法性本來就係有問題,因為大韓民國出現後,就應該結束盟軍佔領局面,交還朝鮮半島予原主。

而大劑係,1948年9月9日北韓成立前,當時仍然係蘇聯佔領區嘅北韓,由北朝鮮人民委員會用嘅旗,都係太極旗,所以文在寅喺 金正恩 面前講嘅嘢好清楚,就係金正恩將會棄國,新嘅統一國家將會係大韓民國,即係東西德統一模式,由於蘇聯根本唔存在,而俄國作為蘇聯大部分事權繼承者,一早無咗喺北韓嘅權利,唔同蘇聯一直有喺東德駐紮,並無實質放棄喺東德嘅事權直至4+2和約,所以只要第二次侵金會完成,之後就可以就兩國合併進行實質磋商,而且 金正恩 應該收到南韓同美國部分俾佢嘅嘢,佢至會答應俾國際監察團去拆嘢咁爽,甚至俾文在寅當眾喺北韓攞威,呢種玩法,DDR年代都唔會咁玩。

金正恩 唔會突然喺平壤消失,因為勞動黨以至北韓軍隊嘅前途問題,都係要討論,當年德國處理Volkspolizei同Nationale Volksarmee嘅問題都一鑊泡,甚至係部分今日德國問題嘅遠因(因為NVA退役人員視同為外國軍隊效力,收到嘅退休金極低),南韓唔可能咁樣玩,但當 金正恩 功成身退後,佢應該喺瑞士享受佢嘅人生,甚至係由大韓民國政府供養佢一世,只不過,呢個安排,一定好遠過做中國傀儡,但一啲實質利益都收唔到, 金正恩 係一個聰明人,佢嘅狡猾程度遠高於中國班友,佢係生錯國家,如果佢生喺南韓,一早係最古惑政客之一。

發表迴響

你的電子郵件位址並不會被公開。 必要欄位標記為 *