山竹-解放軍-min

解放軍 艦隻宣稱登陸避險真係膠到一個點

話說山竹搞到 解放軍 駐港海軍嘅艦隻擱淺,兼且暴露失修嘅真相,呢件事本來已經膠到一個點,俾其他國家駐港武官睇到 解放軍 嘅狀態,佢地會點會報返佢地自己國家,真係大家心中有數。點解 解放軍 沒有最膠,只有更膠,宣稱擱淺事件係登陸避險,呢個挑戰人類常識嘅講法,我真係去到無眼睇嚟形容。

解放軍 作理由都搵個好少少

如果呢隻係兩棲作戰艦隻,登陸避險呢個講法都勉強可以講得通,因為佢可以喺陸上,而陸上比水上安全嘅,呢個講法我都用一個好寬鬆嘅標準收貨,但出事果架「南交86」係一架軍用交通艇,軍用交通艇即係運兵船,大家聽過運兵船具備兩棲作戰能力未?呢個理由真係匪夷所思到一個點,所以呢個理由,令 解放軍 膠上加膠,因為佢地係連基本公關都唔識。

其實呢件事反映,香港如果有乜天災,只能靠香港紀律部隊自己搞掂,仲要係食緊以前英國訓練嘅老本,而靠中國軍隊根本唔可能,因為中國軍隊不單作戰能力有問題,而且佢地喺災難嚟果陣,自己嘅艦隻都未必頂受得住狂風巨浪,你覺得佢地具備拯救嘅能力,呢個玩笑係唔係開大咗少少咁,喺危難果陣,大家認為軍隊可以救人,除咗軍人體能比較好,同埋軍事作戰上,本來有救難訓練之外,仲有係大家一向認為,軍隊裝備同編制比較有抵禦天災嘅能力。但現況係,你可以認為英軍具備呢個能力,但我唔好預期 解放軍 具備呢個能力,你香港紀律部隊唔駛救埋 解放軍 ,呢樣嘢已經叫大話夾好彩果隻,真係膠到無法形容嘅地步。

解放軍 本身已經有屠殺平民嘅前科,加上本身黨衛軍嘅本質,已經好難得到香港公眾嘅尊重,軍隊對平民開槍,除非平民手持軍用水平武器,否則呢個係不可接受,呢個亦都係基本常識嚟嘅。依家 解放軍 仲要咁嘅水準,裝備同人員水平都咁差,只要 解放軍 喺外面鬧事,出現軍紀上問題,你就真係以後唔駛旨意喺香港留低。有人話俾 解放軍 以便裝出軍營,呢個主意差到極點,只要有人飲大咗,跟住喺外面打交,你打香港人固然好大鑊(雖然有成班土共同左膠護住你),你打外籍人士就更大鑊。呢啲咁嘅軍隊,呢廿年無出事都係一種修為,但我睇無以為繼。

發表迴響

你的電子郵件位址並不會被公開。 必要欄位標記為 *