國泰航空-min

國泰航空 連公司英文名都串錯:廈門港機馬虎態度所致

國泰航空 鬧咗一個正常英資公司唔應該鬧嘅笑話,機身 Cathay Pacific漏咗個 f字,變咗 Cathay Paciic ,呢件事變咗全香港同英國嘅笑話,當然大家都知呢件笑話來源唔係 國泰航空 ,而係同集團旗下廈門太古飛機工程公司。呢件事,其實我唔係太笑得出。

國泰航空 笑話以外嘅問題

呢個世界有啲膠嘢,可能純粹有人硬膠,但飛機維修呢行唔容許膠嘢,因為涉及人命,如果飛機維修馬馬虎虎,係可以十分之大鑊,而 國泰航空 Cathay Pacific 咁大個英文字都可以漏,你覺得廈門太古飛機工程公司班友有幾認真,如果日後 國泰航空 或其他廈門太古飛機工程公司出乜嘢事,我相信大家就完全笑唔出,所以呢件事喺我眼中唔係笑話,佢係一個管理問題,如果 國泰航空 係注重安全,應該盡量將維修工作交俾態度比較好嘅香港人,廈門太古飛機工程公司嘅態度,我完全不敢恭維。

呢件事,我諗起 國泰航空 雖然整體係okay,至少好過好多歐洲航空公司(你試吓坐Eurowings,啲飛機餐難食度係嚇X死你,你俾Smart fare完全係為咗啲行李,果啲飛機餐真係免問,你食過就知),但航空安全呢個問題上,我認為中國飛機維修係一大安全漏洞嚟,至少呢個國家嘅國民習性係信唔過。我坐 國泰航空 唔只一次啲Entertainment System係壞,唔係唔work係連掣都壞鬼埋,當然亦可能同啲乘客使用習慣有關,但我唯一對 國泰航空 嘅戒心唔係服務態度,而係維修嘅嚴謹程度同水平。

有人話廈門太古飛機工程公司有咗好耐,無錯,呢間英資公司係搵班港機香港元老去開山,早期至好一段時間,啲管理人員係英國人同香港人,但大家睇依家廈門太古飛機工程公司嘅文件,好多中文版遣詞用字充滿中國共產黨式假大空味道,你相信呢間公司嘅廈門員工,喺工作同管理文化上能夠謹守一貫英國、香港公司果種相對嚴謹嘅精神,我個人真係一啲都唔相信,所以呢次機身公司名串錯字事件,並唔係香港人有問題, 國泰航空 驗收固然有問題,但廈門太古飛機工程公司本身,都係需要作出內部檢討同改革。

發表迴響

你的電子郵件位址並不會被公開。 必要欄位標記為 *