十號風球-min

十號風球 之後

十號風球 發出後,香港出現災情比以往嘅都嚴重好多,我由Facebook所見,頭兩個鐘都冧樹冧牆到咁,仲應該陸續有傳停電報告,政府不如當機立斷,提早宣布停工停課,因為好多道路同供電系統問題,唔停工停課只會更亂。

十號風球 期間同之後面對嘅事

唔計核電廠問題,以下問題,大家必須處理

1. 喺杏花邨、鯉魚門嘅車主,你應該揸走你架車,去附近嘅有蓋多層停車場,因為風暴潮頂點,喺下午兩點到五點,我估你等果陣撤退都已經total loss,基本上,試圖揸離杏花邨地區。

2. 依家各架空電纜系統受到嚴峻挑戰,所以,隨時會停電,如果你有後備發電機,應該係準備攞出嚟用。同埋,依家係時候搏命幫你嘅尿袋同手機充電,因為蘇州過後無艇搭。仲有,因為隨時電壓不穩,如果無必要,唔好落街,如果落街,唔好坐𨋢,因為隨時就變困𨋢,你就喺電梯度慢慢食驚風散。我相信應該有唔少困𨋢嘅報告,消防員呢鑊真係唔疲於奔命就奇。

3. 電視睇唔到係正常,因為呢啲咁嘅風力,大廈公用天線被隊冧係好正常,或者斷咗天線去大廈嘅同軸電纜接駁位,真係一啲都唔出奇。如果你想知道風暴消息,除咗手機,應該準備FM收音機,係,你考DSE聽綠袖子果部收音機。最好有幾粒AA電,如果你用係Ni-MH充電,唔該有幾多充幾多,因為無人知幾時全港大停電。

4. 唔好坐近窗邊,依家爆玻璃機會有增無減,你至少要捱過下午五點。如果你係新界村屋,小心頂樓啲嘢吹走,或你隔離屋頂樓啲嘢被吹走然後吹到你果度,呢個風,簡直係黐線。

5. 住近海邊偽豪宅住戶,你嘅樓宇被吹爆玻璃是正常的,唔該日後同你間屋做Scotchshield之類加固工事,一方面節能,另一方面係費時又嚟一件山竹,你就真係有排痕。我唔賣,你搵新填地街或駱克道啲鋪頭問,同安排師傅幫你安裝呢啲加固工事,基本上,等同幫你嘅窗戶做防彈玻璃,我個人推薦海邊居民,以及村屋居民安裝呢啲加固工事,呢個都係跟隨美國應付怪物颱風嘅標準做法啫。

依家,我只能祝大家好運。

2 thoughts on “十號風球 之後

發表迴響

你的電子郵件位址並不會被公開。 必要欄位標記為 *