HSBC還安全嗎?

在一個月前,我呢度已經警告過,HSBC係有可能出事,因為HSBC手上的衍生工具實在太多,香港政府同市民要審慎處理。

而呢幾日除咗Citi的Credit Default Swap急升,HSBC的Credit Default Swap一樣急升,仲要急升幾百點子,Credit Default Swap的價格,查實係代表咗,你為咗防止對家違約,你要俾幾多保險金。同HSBC同Citi嘅違約保險金急升,仲要升成咁,邊間銀行肯借錢俾佢地?代表係呢兩間銀行,越嚟越難喺市場上拆借。

而且最硬膠係,Citi拒絕賣Smith Barney,以我對Citi嘅了解,Smith Barney有嘅客都係好客,依家市場咁嘅風頭火勢,亦唔慌賣個好價,Citi管理層嘅決定唔係話唔可以理解,但Citi一崩潰,引發嘅市場信心危機仲勁過雷曼玩完,屆時HSBC仲保唔保得住,我真係俾個大問號。所以,依家揸住HSBC股票嘅,仲好唔好堅持落去,我覺得完全係一場賭博,大家應該諗清楚後果。

不過點都好,如果HSBC或Citi玩完,或被國有化,有啲嘢,我覺得依家香港嘅銀行就要做,唔好等到真係出大煲嘢,然後再賴班投資者輸打贏要:

1. 應該告知果啲HSBC或花旗掛鈎嘅ELN或Minibond的持有人,依家HSBC或花旗可能出現嘅Credit Event,同埋依家可以點做。
2. 如果依家仍然持有果啲ELN同Minibond,可能嘅風險,講咗之後,班友唔可以賴三賴四。
3. 如果依家斬咗果啲ELN同Minibond,可能嘅風險,同樣講咗之後,唔可以賴三賴四。
4. 如果有班友真係銀行班職員老點之下買嘅,例如七十歲老伯,銀行最好依家回購呢啲咁嘅硬膠產品,然後自己諗計快快賣鬼咗佢,好過銀行等到真係爆咗煲至諗計脫逃。

仲有,香港政府係時候同英國政府傾,HSBC一旦出咗事點算,香港成街鈔票都係HSBC發,HSBC如果被英國國有化,香港嘅鈔票可以點處理,呢啲全部要傾清楚度清楚。

6 thoughts on “HSBC還安全嗎?

  1. 香港發鈔要畀美金做保證金,咁如果HSBC有事,任總照計可以(or 必須)用外匯基金收購所有匯豐銀行鈔票卦?

  2. 問題係成個發鈔機制嘅設計,根本無預到發鈔銀行執笠或者被其他國家政府國有化嘅情況。

  3. CDS最大鑊地方在,佢係OTC產品,除非你有Bloomberg機,或者係Phoenix的客戶,否則一般散戶根本好難拎到CDS的數據,呢個係散戶陷入最危險的地方。

    如果唔係我學過fixed income果方面的知識,我都唔知CDS嘅評估作用。

  4. 國有化?共慘主義萬歲,戇鳩o既,有事就政府孭,錢賺咗就自己落袋,好撚好野。

  5. 其實冇關係,因為香港發鈔要先存定額美元做儲備。所以就算銀行執笠,政府都完全有能力將佢既銀紙贖回。

    頂多係香港政府自己印一批銀紙去換好了。

發表迴響

你的電子郵件位址並不會被公開。 必要欄位標記為 *