海航-min

海航 已經頂唔住

海航 承租交易廣場嘅寫字樓樓面,據聞 海航 自己頂唔住,已經決定唔租,依家置地搵緊人接手,當然依家竟然有水魚,比 海航 承租嘅價錢更高租金接咗佢,反映置地嘅實力。但 海航 唔租八層嘅樓面,亦反映呢個所謂中國「主權基金」根本頂唔住。

海航 與一馬

其實由 海航 租交易廣場嘅樓面,大家都可以估到一樣嘢, 海航 最初根本唔係做航空,而係做類似1MDB或淡馬錫控股嘅事,一個掛住航空公司之名嘅主權基金,否則唔會股東結構神秘成咁,但長期獲得國開行支持,可以水喉大到收購希爾頓、德意志銀行呢啲頂級大集團,航空公司收購希爾頓仲叫合理,但航空公司收購德意志銀行,就完全講唔上合情合理,因為航空公司同銀行無協同效應,而承租交易廣場樓面,好明顯係用嚟做主權基金嘅事,四處投資,當然呢啲投資隨時又同一帶一路戰略有關,而如果唔租交易廣場,又點襯得起 海航 喺世界各地嘅排場至得。

問題係依家 海航 嘅情況,好大機會係資金上頂唔住,甚至係虧空晒中國嘅現金,一馬案嘅洗黑錢行為,依家證明咗係納吉偷晒國家啲錢唔知去邊度,搞到馬來西亞陷入公共財政崩潰,甚至國家瓦解嘅危機,如果咁嘅邏輯嚟睇, 海航 又係唔係中國版嘅一馬案,有人借 海航 偷咗大量國家嘅錢,然後唔知去晒邊度,或者好多中國人無對 海航 案有一馬案嘅聯想,但我呢個南洋人,一睇 海航 想租交易廣場嘅行為,再睇 海航 奇怪嘅投資模式,如果 海航 唔係中國版嘅一馬案又係乜?依家大馬零吉開始係咁跌,而 海航 如果頂唔住,甚至根本 海航 賣資產,都補唔番偷走咗嘅中國外匯儲備,中國嘅公共財政又會唔會崩潰?中國咁急於加入共同匯報標準(CRS)下嘅自動交換資料機制,又係唔係中國公共財政已經崩潰咗,需要靠全球徵稅,或換藉口向香港人徵稅,而達致拯救中國公共財政嘅目的。

正常主權基金,應該為一個地方嘅公共財政帶嚟穩健嘅稅收以外財源,但大馬同中國,就亂咁用主權基金為名目虧空公款搵銀,依家咁玩法,睇嚟都係玩到崩潰收場,究竟仲有無得救,我自己都有好大嘅疑問喺度。

發表迴響

你的電子郵件位址並不會被公開。 必要欄位標記為 *