山竹-min

山竹 與核電廠

大家都知道,我某程度上係見證核災難嘅人,因為311果陣我喺東京,亦因此英國NHS要對我狀況監察咗一段時間。而依家 山竹 以史無前例嘅怪物姿態來犯,我認為有件事,中國必須要做,就係廣東省沿岸地區嘅核電廠機組,必須開始進入停機狀況,直至風暴走咗先考慮開番。

山竹 挑戰核電廠應變力

大家重溫一吓福島第一原子力發電所發生乜事,地震本身無摧毀核電廠結構,但由於核電站冷卻水泵無法得到外界電力,而緊急發電機被海嘯沖毀,反應堆無冷卻下爆炸出事,造成爐心熔解。所以依家台灣核電面對颱風嘅標準程序係,只要颱風達到一定威力,就開始減loading甚至停機。但核電廠停機,都唔係百分百停機,實際係喺次臨界狀態,等核裂變反應一次比一次少嚟緩步停機,所以如果明知 山竹 係怪物,就依家就要開始停機,甚至係去到喺颱風期間唔應該再有核分裂反應嘅程度(我唔知技術上可唔可行),至少一旦 山竹 引發嘅暴風潮或巨大海浪破壞核電廠緊急發電機組,都唔會構成事故直至風暴結束,有替代機組為止。呢個就係安全上嘅要求,因為核電廠出事,有乜事係無可挽救。

依家成件事最大鑊係,大亞灣、嶺澳本身係唔係可以通過Cat 3或以上颱風考驗,本身係一個極大疑問,但依家台山用緊果個 European Pressurized Reactor (EPR) ,係連歐洲本身都未經驗證就攞嚟用,依家仲話商業運轉咗,依家嚟件 Cat 3-5 怪物嚟,我睇怕一出事,香港同澳門啲人未浸死,就已經中輻射變晒X光人,成個大灣區變咗福島咁,乜有人認為呢家嘢好好玩咩?依家就應該停咗台山核電廠任何機組運作,直至颱風過後再作檢討,我並唔認為依家係一次測試EPR實力嘅機會,特別果個鋼蓋本身被指含碳太多,係影響安全保護能力。

山竹 真係最牙煙係個核電廠,但核電廠由一班中國人營運,仲要有核電喺歐洲都未經驗證,香港無類似法國核安全局嘅當核電廠營運商係賊辦嘅政府部門。

(我個人最憎嘅台灣Facebook專頁,正係核電流言終結者,呢啲喺天災多地區擁核人士,係全世界最不負責任嘅人渣)

發表迴響

你的電子郵件位址並不會被公開。 必要欄位標記為 *